歐洲議會喺法國時間今日（28日）下午就一項涉及香港人權嘅議案進行表決。呢份議案聚焦黎智英案件同埋初選案45名民主運動人士被判重刑，並強烈譴責香港特區政府，要求港府無條件釋放所有被拘禁嘅民主人士。

議案提到，自《國安法》實施以嚟，香港嘅基本自由同法治不斷惡化，指中國違反《中英聯合聲明》，破壞「一國兩制」同埋國際人權公約。議案強調，黎智英自2020年因「捏造嘅指控」被拘押，可能面臨終身監禁；另外45名民主派人士因參與初選，被控顛覆罪，判刑介乎4至10年。

議案特別關注香港新聞自由嘅持續下滑，《立場新聞》前總編鍾沛權同林紹桐因涉國安案件被判刑，多家獨立媒體被迫停運。根據世界新聞自由指數，香港排名大幅下跌，反映媒體喺《國安法》下面對前所未有嘅壓力。

歐洲議會呼籲，歐盟應針對特首李家超等中港官員實施「針對性制裁」，取消香港嘅優惠關稅待遇，並重新審視香港駐布魯塞爾經貿辦事處嘅地位。同時，議案建議成員國向國際法院提告中國，指控其強行喺香港同澳門實施《國安法》。

議案亦指出，《國安法》嘅域外管轄權同跨境鎮壓海外港人社群問題日益嚴重，呼籲歐盟成員國暫停與香港同中國嘅引渡協議，並設立法律援助基金，支持被壓制嘅香港民主運動人士。

為支援本地嘅民主運動，歐洲議會建議歐盟駐港辦事處加強探訪被拘禁人士同審判觀察，並設立人權專員，要求港府允許記者自由報道，保障新聞自由。議案同時呼籲歐盟外事機構進一步支持香港嘅新聞自由同相關國際關注事項。

議案預計將獲得歐洲議會通過，但相關決議並無約束力，純粹係政策建議，供歐盟27個成員國參考。事實上，歐洲議會過去多次通過涉及香港嘅決議，包括今年4月譴責《國安法》相關案件，並呼籲釋放黎智英、李宇軒等民主運動人士。