因為中國恆大集團嘅債務危機，唔少投資者積蓄受損，近期喺深圳展開咗低調行動，要求當局提供調查進展。據悉，喺本週一（11月25日）開始，超過500名投資者分批去到深圳唔同嘅政府機構，包括調查局、市公安局經濟犯罪偵查局同法院，提出佢哋嘅訴求。呢次行動係自2022年以嚟，首次有規模嘅投資者集體行動。

有參與者透露，為咗避免激怒當局，佢哋特登揀用官方指定嘅渠道表達訴求，並分成小組逐步行動，減低被視為公開抗議嘅風險。一名參與者話：「我哋需要保持低調，逐個去傾，唔好比人覺得係抗議，否則可能隨時比叫停。」有現場目擊者指，週一喺調查局外面，週三喺法院附近，分別見到數十人聚集。據了解，行動嘅時間同集合地點，直到當日先喺投資者微信群公佈，為咗避免引起過多關注。

恆大集團喺破產時，負債超過3,000億美元，拖欠承包商同投資者嘅款項，令內地嘅房地產行業陷入前所未有嘅危機。喺2021年底至2022年初，曾經有大批投資者聚集喺深圳嘅恆大總部外，要求償還貸款同兌付逾期嘅理財產品。消息人士話，今次行動嘅主要目標係讓當局聽到投資者嘅不滿聲音。一名參與者講：「如果我哋依家唔發聲，以後就冇機會再講。」

深圳警方早喺舊年9月宣佈，拘留咗部分恆大金融財富管理公司嘅員工，調查佢哋可能涉及嘅違規行為。不過，至今仍然冇進一步嘅消息公佈，令投資者感到非常失望同憤怒。恆大曾經推出年回報率高達12%嘅理財產品，仲送奢侈品作贈品吸引客戶。呢啲產品吸引咗超過8萬人投資，為公司籌集咗接近140億美元。不過，隨住公司債務危機爆發，投資者損失慘重。

根據路透社報道，中國中產階級因投資失利血本無歸嘅挫敗感越嚟越強，而投資者近期嘅低調行動，反映出佢哋對政府調查進度嘅不滿。

此外，中國經濟增長放緩亦加劇咗社會緊張局勢。近期多宗與經濟糾紛相關嘅襲擊事件，令社會穩定問題更加嚴峻。雖然中國當局一向對抗議行動嚴密監控，但有時亦會因應民意作出政策調整，例如之前放寬疫情封控限制，或者處理銀行欺詐事件時向存款人賠償等。

人權組織「自由之家」旗下嘅報告指出，2024年第三季，因經濟問題引發嘅抗議活動有826宗，同比增長咗31%。其中包括因開發商破產導致嘅樓房無法交付同工資拖欠問題。分析人士認為，北京可能需要推出更多經濟刺激措施，去紓緩民眾壓力，改善家庭財務狀況。