烏克蘭軍方日前首次使用美國援助嘅ATACMS飛彈，對俄羅斯境內軍事設施進行打擊，標誌住呢場衝突進入新階段。根據烏克蘭媒體報道，呢次攻擊瞄準咗布良斯克州嘅軍火庫。俄羅斯國防部隨即證實事件，指飛彈攻擊未造成人員傷亡，但承認有一枚飛彈殘骸墜落喺布良斯克州嘅軍事設施，引發火警。

網上有段影片流傳，顯示疑似ATACMS飛彈喺夜間發射，直飛俄羅斯境內。據了解，呢次攻擊得益於美國總統拜登最近批准嘅援助，授權烏克蘭使用美製武器打擊俄境內地面目標。ATACMS飛彈射程達300公里，將為烏克蘭軍方喺戰術上提供更大靈活性。

消息曝光後，俄羅斯各界反應激烈，普京總統迅速簽署文件，更新俄國核威懾政策，進一步擴大核武器嘅威懾範圍，表示俄羅斯會將任何無核國家喺有核國家參與或支持下對俄羅斯發動嘅攻擊，視作聯合侵略行為。新政策重申俄方保留使用核武嘅權利，以回應任何對俄羅斯及其盟友嘅大規模殺傷性武器攻擊。克里姆林宮發言人佩斯科夫強烈譴責美國，稱此舉標誌住「美國對衝突嘅介入已升級至新局面」。

呢次事件引起多國關注，法國總統馬克龍喺里約熱內盧出席二十國集團峰會期間表態，認為拜登嘅決定「正確且合理」，係對俄羅斯持續升級行為嘅必要回應。佢指俄羅斯持續派遣北韓士兵入戰場幫手，促使西方更放寬對烏克蘭使用武器嘅限制。馬克龍強調：「俄羅斯係唯一作出升級行為嘅大國，美國嘅決定係為應對呢個現實。」早前，馬克龍已公開支持烏克蘭針對俄羅斯境內軍事目標行動，認為俄方利用西方武器限制進行反擊。

英國亦可能跟隨美國步伐，考慮向烏克蘭提供“風暴之影”遠程導彈。而德國則表示仍然堅持唔提供遠程導彈俾烏克蘭嘅立場，認為應該保持謹慎。

呢次空襲令俄國內部警惕。布良斯克州鄰近烏克蘭邊境，與近期俄烏激烈對峙嘅庫斯克州接壤。庫斯克州成為俄軍前線重點，消息指北韓援助俄羅斯嘅約1萬人部隊已經部署至庫斯克地區參與戰鬥。由於地理位置特殊，布良斯克州被視為烏克蘭擴展打擊嘅戰略重點，對未來兩國戰略形勢影響深遠。