隨住中國經濟低迷波及金融業，國企配合政府推動經濟平等政策越嚟越緊。近日有消息指，中國十大基金公司開始要求高層退還過去五年超出上限嘅薪酬，配合「共同富裕」運動嘅目標。

根據路透社獨家報道，中國招商局集團旗下嘅招商基金管理公司，已經通知公司高層退返2019年至2023年期間年薪超過三百萬人民幣嘅部分。消息指，公司已經通知大約60位投資組合經理同高層主管，並於今年6月開始行動，7月開始陸續收到退款。但暫時未清楚已經離職嘅高層會唔會都要退還超標部分。

自2021年「共同富裕」運動推行以來，中國金融業開始逐步配合政策，限制高薪同追回超標工資成為國企嘅「標準操作」。金融業高層特別係基金經理喺股市唔景氣嘅情況下仍然賺取高額利潤，成為政策整頓嘅目標。

博時資本管理公司同樣響應母公司招商局集團嘅要求，將高層薪酬上限設喺290萬人民幣，超出部分必須退還，呢個措施喺今年6月起開始執行。產業專家指出，呢類削減薪酬同福利嘅措施可能會影響中國規模達4.3萬億美元嘅基金業吸引同挽留人才嘅能力，並可能減低員工提升績效嘅動力。

不過，根據21世紀經濟報道，相關基金公司要求高層退還薪酬嘅消息被指係「傳言」。報道引述業內人士話，行業整體薪酬下降嘅大趨勢仲會繼續，監管部門推出嘅薪酬改革主要係為咗關注基金經理嘅實際業績，激勵佢哋持續創造價值。有公募人士話，金融業嘅薪酬高低最終係由市場決定，市場自然會調整到合理嘅價位。

另外，根據彭博社嘅報道，光大集團、華融國際控股等多間金融公司亦要求駐香港嘅部分管理層，甚至已經離職嘅員工退還之前發放嘅部分獎金。呢係國企首次將限薪措施推至香港，顯示佢哋節省薪酬成本嘅決心愈嚟愈大。

雖然措施引起業界各方唔同嘅聲音，但面對經濟低迷同市場表現唔振，基金公司能唔能夠順利配合政府政策，仲有待觀察。