政府喺疫情後大力宣傳造價82億元嘅啟德郵輪碼頭,行政長官李家超喺3月時更指出當月有4艘國際郵輪同時停靠,反映香港喺郵輪旅遊方面具吸引力。然而,短短三個月後,碼頭嘅情況急轉直下,大堂昏暗無光,商舖同食肆冷清,甚至陸客都感到失望,直言「下次唔會再嚟」。專門喺碼頭辦活動及協助外國郵輪招聘船員嘅「香港郵輪及遊艇業協會」,亦批評港府唔重視郵輪業發展,決定撤出香港,將註冊遷往新加坡。
到底啟德郵輪碼頭有幾似「死城」?《自由亞洲電台》記者喺二樓走廊行咗幾分鐘,仍然人跡罕至。轉入等候區域後,先聽到啲人聲。然而,進入等候區就漆黑一片。有保安趕遊人走:「你最好行出去先。」
造價82億元嘅郵輪碼頭喺三月時曾一度「輝煌」,有4艘國際郵輪同時停靠,但而家似乎又「打回原形」,按照船期本月只有一艘郵輪,深圳嘅「地中海榮耀號」停泊。無船靠岸嘅日子,碼頭宴會中心午市只有一兩枱客。同一商場嘅零食舖及咖啡餐室,亦都係店員比顧客多。至於西餐廳,職員亦表示生意慘淡:「你見到出面都係咁靜,係唔係?」
《自由亞洲電台》觀察到,星期五嘅碼頭大部分係大陸客或退休人士。陸客陳小姐表示:「係呀,好荒涼,與預期嘅唔一樣,點解無人嘅?上網會睇到可能有郵輪坐。」陸客張生張太因碼頭特別靜而嚟休憩:「感覺應該有更多嘅人嚟,我哋唔係太了解。」陸客游先生則認為喺郵輪碼頭可以見到香港嘅繁榮:「碼頭嘅經營情況我唔太了解,但係我覺得呢度好繁華,同我想像嘅一樣,嚟咗好開心。」
面對唔明朗嘅前景,「香港郵輪及遊艇業協會」決定向政府投下不信任票,喺本月10日撤出香港,將註冊遷往新加坡。協會義務幹事楊梓呈喺《商台》節目中表示,香港喺碼頭嘅管理同交通配套未如預期,即使暑假亦只有數艘郵輪停靠,批評港府唔重視郵輪業發展:「如果係選擇性畀遊客一個體驗嘅話,船公司會比較傾向到其他城市,或選擇其他碼頭,呢包括成本、接待力同支援方面。依家好多品牌對香港嘅形象都與以往唔同,加上接待力未達船公司嘅期望,總部要求話不如唔好香港,搬去新加坡啦。」
對於協會撤出後嘅應對措施,文化體育及旅遊局僅回應指,一向重視郵輪業發展,又指今年派船嚟港嘅郵輪公司數目達29家,回復至疫情前嘅水平。