再有海外法官宣布唔再做香港終審法院嘅非常任法官。曾擔任加拿大首席大法官嘅麥嘉琳(Beverley McLachlin),喺7月底任期屆滿之後唔會續任。佢話依然對香港法院嘅獨立同維護法治嘅決心充滿信心。
上星期,岑耀信(Jonathan Sumption)亦宣布辭任香港終審法院非常任法官,並喺英國《金融時報》撰文,形容香港嘅法治岌岌可危。佢提到,香港法院喺5月底裁定民主派初選案14名唔認罪嘅被告「串謀顛覆國家政權」罪名成立。法庭判定議員否決財政預算案唔係容許向行政長官施加政治壓力嘅方式,咁樣令立法機關無法履行憲制上應有嘅職能,更被定性為犯罪嘅陰謀。
岑耀信喺文章中指出,雖然呢個裁決可能會被上訴庭推翻,但它顯示出香港司法制度出現咗萎靡嘅徵兆。儘管法官們熟悉普通法,但佢哋喺中國創造嘅「不可能嘅政治環境下」工作,自由受到極大限制。法官們知道,如果佢哋嘅判決唔合乎北京當局嘅心意,全國人大常委會可以透過釋法將判決推翻,就好似北京拒絕讓《蘋果日報》創辦人黎智英聘用英國御用大律師一樣。
佢進一步指出,《國安法》生效之後,香港政治異見者被打壓,民主派團體紛紛解散,親民主傳媒相繼停運,淨係剩下順從政府嘅媒體、立場強硬嘅議員、官員及政府喉舌。喺呢種壓抑嘅氣氛下,本地法官需要非比尋常嘅勇氣去對抗強大嘅政治洪流,而佢哋與海外法官最大嘅分別係無路可走。佢認為,好多法官喺呢種日漸灰暗嘅政治環境下,已經忘記咗自己作為自由捍衛者嘅傳統角色。
此外,岑耀信提到,儘管《基本法》同《國安法》聲言保障言論與集會自由,但現實卻係即使表達最微小嘅異見,都會被視為號召革命,出版「不順從」內容嘅漫畫、唱支持民主嘅歌曲、為天安門事件受害者默哀,都會被判處重刑。佢喺文章結尾中話,香港已逐漸變成一個極權主義嘅地方。佢希望海外法官嘅存在能繼續維持香港嘅法治,但承認呢個想法已變得不切實際。
香港特區政府發言人對此回應,表示極不同意岑耀信嘅個人意見,強調特區法院喺審理國家安全案件或任何性質嘅案件時,絕對無受到中央或特區政府嘅任何政治壓力,香港法治亦無任何倒退。任何人士無論出於咩理由或動機而提出相反結論,係完全錯誤和毫無根據,港府必須正義凜然地予以反駁。
與岑耀信同時辭職嘅英國法官郝廉思當時表示,係因「香港嘅政治形勢」而辭任。2018年獲委任為終審法院非常任法官嘅麥嘉琳,於周一(10日)宣布,7月底任期屆滿之後唔會續任。佢話5月下旬已向終審法院首席法官張舉能告知呢個決定,希望有更多時間陪伴家人,並表示好榮幸能為香港人服務,對香港法院嘅獨立性與維護法治嘅決心充滿信心。
現年80歲嘅麥嘉琳,喺2000至2017年間出任加拿大首席大法官,亦係加拿大樞密院成員。喺麥嘉琳7月底離任之後,香港終審法院嘅海外非常任法官人數將減至7人。