俄羅斯首都莫斯科音樂廳恐襲案，死亡人數達139人。承認發動襲擊嘅極端組織伊斯蘭國表示，俄國以酷刑對待被捕嘅恐怖分子，只會增加組織嘅殺戮慾望，警告會向俄羅斯總統普京同埋俄羅斯人發動襲擊。

4個參與音樂廳襲擊嘅槍手，喺星期日被帶到莫斯科法院，佢哋各有唔同嘅傷勢。多個俄媒發布槍手被捕時嘅影片，顯示有人被毆打同電擊。

俄羅斯總統普京表示，莫斯科音樂廳恐襲案可能係2014年嚟，基輔嘅新納粹政權對俄作戰一系列圖謀中嘅其中一個環節，而美國正透過各種渠道，試圖令其他人相信恐襲同烏克蘭無關。

普京同官員開會時指，俄方知道呢宗恐襲係激進伊斯蘭分子所為，指伊斯蘭世界幾個世紀以嚟一直打擊呢種意識形態，但俄方更關心邊個係幕後策劃，要問呢場襲擊對邊個有利，佢又質疑涉事恐怖分子犯案後試圖逃往烏克蘭，並問有邊個喺烏克蘭等佢哋。

美國白宮國家安全委員會發言人柯比反駁俄羅斯指控，指俄方嘅說法係克里姆林宮嘅宣傳技倆，強調恐襲係一次由極端組織「伊斯蘭國」呼羅珊分支嘅特工實施嘅襲擊。美國事前已經警告過俄羅斯。

美國國務院發言人米勒表示，今個月初已警告過俄羅斯，莫斯科有可能發生恐怖攻擊，目標針對大型集會，包括音樂會，同時亦向喺當地嘅美國公民發出安全警告，要求避免前往大型集會。

值得留意嘅係，中國前環球時報總編胡錫進3月23日轉發咗央視關於恐襲嘅新聞，標題係「俄聯邦安全局：4名參與莫斯科州音樂廳恐襲事件嫌疑人企圖向烏克蘭方向逃脫」嘅帖子，同官方表示「俄官方出面確認恐怖分子試圖逃往烏克蘭，並與烏方取得了聯繫。這起恐襲不僅十分罪惡，而且很可能正在將整體局勢推向新的臨界點。」

不過由於這條帖文帶風向之心太明顯，所以不少內地網民表示「栽贓烏克蘭了，鵝毛之心，路人皆知」「說說從莫斯科怎麼往烏克蘭跑，穿過前線交戰區？」「俄羅斯必須把恐怖攻擊者和烏克蘭連結起來，ISIS 認了都不行」「美情報機構提前告知，為何不聽勸」，更有人指「去年哈馬斯的暴行，大鵝在背後使陰招，這回被錘了」「去年10月以色列發生恐怖攻擊，其中還有幾名中國人受害，也沒見老胡這麼義憤填膺」。