《華盛頓郵報》（The Washington Post）日前刊登社論，話香港喺國安法頒布咗之後，又設23條立法，大幅限制香港言論自由。中國外交部駐港公署嚟回應，話呢啲係謬論，仲話華郵雙標，又質問美國9.11事件之後美國只用咗45日就通過咗《愛國者法案》，問華郵有冇提出異議，但有報章FC過真係有，反駁隊呢次似乎低質咗啲。

華郵呢篇名為《香港以新安全法加大鎮壓力度》嘅社論話，香港自泛民主派人士47人遭逮捕，到「蘋果日報」創辦人黎智英成為階下囚，一再顯示香港言論自由被扼殺。

社論指出，嚟緊香港23條立法將擴大鎮壓範圍，包括增設盜竊國家機密、間諜、叛國同埋外部干預等罪名，仲加埋只有30日嘅公眾意見咨詢期，顯示香港嘅自由正處於下降軌。

社論提及，如果呢段期間認真聽取批評意見，就會發現國外使團對於「外部干涉」嘅疑慮，擔心正常嘅外交接觸會被認定係刑事犯罪；律師協會開始擔憂將產生寒蟬效應；商業團體表示呢樣嘢會危及香港作為安全投資地嘅地位；記者會擔心「國家機密」成為刑事犯罪後，日常報導會被扼殺。

中國外交部駐港公署12日特地致信華盛頓郵報，話呢篇文章係謬論，說話係「無知和雙標」。發言人表示，47人初選案唔係社論講咁無辜，表示香港法院會作出公正裁決。

針對23條立法，發言人話「關於香港基本法23條立法，你報聲稱公眾諮詢期僅一個月是「縮短」了的。據我所知，9.11事件發生後美國祇花了45天就通過了《愛國者法案》，其間並未舉辦過一場聽證會。依你報標準，立法時間是否也太短了？你報可曾提出異議？」

不過，據《明報》報道，翻查資料，喺2001年10月26日《愛國者法案》通過之後一日，《華郵》就以以《A Panicky Bill》（驚慌失措的法案）為題發表社評，質疑倉促立法「代表立法過程失效，長遠而言，國家將會後悔」。原來外交公署發言人查都唔查下就質問，實在貽笑大方。

有網民表示「FC都未識」「反駁隊：駁唔到」「根本駁嘴隊同五毛一樣咁低質」「駁嘴前可唔可以Google咗先」。另外亦有人為《明報》擔心「咁直接明報準備執笠都得」。