香港中下價飲食業服務差，相信唔少人都遇到，可以話係普遍性嘅問題。近日新加坡《聯合早報》喺尋日（12日）發表評論文章，直指香港變咗做「趕客之都」，指名餐飲業服務態度差、限制時間用餐、催埋單嘅唔合理行為令人食到一肚氣，仲指侍應「長期處於很憤怒的狀態，彷彿他們才是消費者」。

文章以《香港為何變咗成「趕客之都」？》為題，作者戴慶成表示上星期五（8日）出席一個講座後，同其他講者去咗附近一間酒樓聚餐，酒樓經理直言「只有一個鐘用餐時間」，佢表示呢種情形係首次遇到，正當大家面面相覷準備去其他餐廳嘅時候，經理見勢頭唔對，改口答允可以坐個半個鐘。但作者直言酒樓用咗「啲小手段」迫佢哋盡早離開，例如點菜後十幾分鐘，就有上晒一大堆菜餚，食完侍應立即走嚟執檯，暗示要埋單離開。事後佢哋一齊認為酒樓「食物尚可，但服務水平真是不敢恭維」。

作者表示，香港旅遊業喺疫後復甦進度不如預期，唔單止冇遊客少，連香港人都一窩蜂咁北去深圳消費，令香港商場餐廳週末冷冷清清，零售餐飲業都叫苦連天。佢指好多內地朋友近年嚟香港旅遊後，都不約而同大吐苦水，批評香港酒樓同茶餐廳嘅侍應「好像很煩躁，從下單到付款都處在一個很憤怒的狀態」，彷彿佢哋先係消費者咁樣。佢批評有啲餐廳甚至設立啲唔合理規矩，包括限制時間用餐、唔俾客人揀位、要求食客搭檯等，「令人吃得一肚子氣」。

作者分析認為，香港租金一直高企，餐廳為咗維持收入只能追求喺有限時間內服務最多顧客，侍應遇到慢條斯理嘅食客，往往會拋白眼甚至惡言催促。而且香港打工仔嘅工作時間偏長，飲食同零售業嘅僱員平均每日站十個鐘工作，好難長期保持微笑。加上香港過去三年出現移民潮，各行業人手唔足，零售餐飲業尤為嚴重，大部分人唔擔心失業，自然有本錢向顧客擺「臭臉」。

作者又提到同樣係服務業嘅的士，佢引述香港的士業議會舊年復辦 因疫情停辦三年嘅「的士服務質素」調查，訪問咗全港1211名乘客。結果發現，的士服務評分比疫情前大跌7分，只有58.4分，當中以「司機待客以禮」評分最低，反映的士司機服務質素大不如前。

作者直言香港餐飲及零售業嘅禮貌問題由來已久，甚至已成社會頑疾，只係近來更加嚴重，加上深圳嘅服務水平不斷進步，有比較下自然令香港問題更加突顯。文章最後引用劉德華著名言「今時今日咁嘅服務態度唔夠架」，指如果問題唔解決，香港「趕客之都」嘅地位只會越嚟越鞏固，影響對外形象同經濟復甦。

有網民留言表示「飲食業常怨無生意，早已話自己攞嚟，侍應又懶又污又無禮貌」「飲食業自己唔爭氣，唔好賴香港人離開」「所以北上係正確做法」「比香港政府更為看清香港所發生的事實」。

不過亦有人解釋指「因為租金壓搾左服務水平，做少幾轉客，直頭執得，仲講咩服務水平。就好似的士牌，小巴牌咁，車租咁貴，司機梗係有咁x得咁x喇」。