港府今日（8日）刊憲公布《維護國家安全條例草案》，建議將叛國、叛亂、煽動顛覆國家政權等罪行列為刑事罪行，最高可判終身監禁。草案亦建議，若任何人串謀或意圖實施上述罪行，亦屬違法。

行政會議成員、資深大律師湯家驊表示，喺草案立法下，針對內地旅客挑起憎恨可屬違法，但若出發點是為消除兩邊仇恨，就不屬違法。

早前有議員關注港人針對內地旅客，挑起市民對他們嘅憎恨，係咪同屬煽動。律政司司長林定國表明，部分港人曾以內地客構成滋擾爲由，對其使用侮辱性詞彙，挑起仇恨情緒，屬於23條當中煽動罪嘅範圍。

湯家驊今日表示，煽動罪在《刑事罪行條例》一直存在，而23條立法最主要是將答辯理由寫得更清楚。法庭需要了解犯罪意圖，鼓吹憎恨自由行嘅人，之前同現在都屬違法。不過佢指出，如果出發點只係報道情況，希望消除敵對情緒，咁就冇犯法。

不過，湯家驊指，如果相關罪行有持續性，就要視乎行為係咪延續到23條法例生效之後，仍然有危害國家安全意圖。他又指，相比起英國、美國等國家嘅條文，今次23條草案內容，其實係比較溫和同寬鬆，而草案提及尊重及保障個人權利，更易令市民安心。

湯家驊舉例，加拿大有關披露國家秘密嘅罪行，披露者須要事先通知相關部門，但本港23條草案就未有加入。至於草案訂明警方調查國家安全罪時，可向法庭申請延長被捕人羈留期最多14日，湯家驊指，須總警司或以上人士向法庭申請審批，但英國、新加坡沒相關規定，可見23條草案其實更寬鬆。

另外草案針對潛逃者提出多項措施，例如撤銷護照、吊銷執業資格等，湯家驊承認實際作用不大，但過去有唔少人潛逃海外，認為「唔處理好難交代」。

關於侮辱內地客挑起仇恨屬煽動罪，日本香港民主聯盟執行總監李伊東質疑，港府刻意將被認爲過時嘅「煽動罪」延伸到港人日常生活當中。佢指出，香港係不同族群聚居嘅地方，港府從未把任何族群視爲特例。而林定國嘅說法，令人感覺內地人被厚待。

李伊東指出，所謂「針對性」及「侮辱性」定義含糊不清，估計這是爲了方便當局應對而家仲估計唔到嘅情況。目前好難評估係咪真係會以煽動罪將人入罪。佢提醒港人要特別小心跟內地人嘅互動。