本港近年出現移民潮,加上出生率連年下跌,令入讀幼稚園嘅學生減少,接連有幼種園執笠。喺屯門設校逾30年嘅屯門新一代英文幼稚園今日(6 日)宣佈,將會喺8月開始停辦,營運至今年7月31日止。校方向家長發出嘅通告指,學校喺無法承受嘅經營壓力下,經校董會審慎考慮,無奈作出艱難嘅停辦決定。
校方表示,近年面對一連串重大挑戰,包括本港出生率持續下降、學生人數大減、年青家庭移民成風、校舍老舊等。除此之外,校方同業主商討調整租金亦唔成功,所以作出呢個決定。
校方又指,學校仲會喺今年 7 月畢業嘅學生度舉辦畢業活動,表示「期盼小朋友有愉快美好之童年經歷」。
教育局表示,一直就「新一代」停辦事宜同校方緊密聯繫,已經提醒校方需要協助家長/學生處理離校嘅相關事宜,同埋為現有學生提供適切支援,例如協助轉介合適嘅學校、提供附近學校嘅學位資訊。
教育局指出,現時屯門區內有足夠嘅幼稚園學額同幼兒中心名額俾家長選擇,全港各區參加教育局「2024/25 學年幼稚園幼兒班(K1)收生安排」嘅幼稚園幼兒班至高班(K1-K3)學位空缺資料亦已經上載教育局網頁,學校需要盡快通知家長同各持份者有關細節,同埋做妥善安排。
屯門新一代英文幼稚園喺 1989 年成立,係私立幼稚園,校長係張琼芳,校監係許永渡。根據教育局資料,幼兒班同低班半日及全日班學費分別為每期 $43,356 元同 $69,156 元,高班學費則為 $38,928 元同 $69,156 元。
本港近年有多間幼稚園宣布停辦,其中去年 12 月,由香港浸會大學持續教育學院創立嘅香港浸會大學附屬幼稚園,將喺 2024/25 學年停辦。
去年 11 月,香港教育大學幼兒發展中心向家長發出通告表示,將喺 24/25 學年起分階段停辦,喺 25/26 學年結束後正式停止營運。
傳統名幼「根德園幼稚園」亦喺去年9月宣布,會喺2025/26 學年完結後正式閉校,結束近60年歷史,校方解釋停辦原因,包括本港出生率下跌至歷史新低,年青家庭移民成風等。