保安局局長鄧炳強今日表示，基本法23條立法諮詢已上月28號結束，共收到13,489份意見書，當中98.6%係支持立法。佢批評正被通緝嘅前立法會議員許智峯，近日喺網上披露警員同司法人員名單，仲呼籲市民協助「起底」，直言佢嘅行為係「衰到冇朋友」。

鄧炳強表示，喺反對意見書中，約一半係冇署名或者無法辨認身份。而喺48份可辨認身份嘅意見書中，有四分一係嚟自境外反華組織同埋潛逃到外地嘅通緝犯；或者因為國家安全相關案件、被扣留喺獄中、名稱同署名相同嘅人士。

佢強調23條立法具防禦作用，比喻係為咗香港同國家安全而要鎖好門窗，並指「當想危害國家安全嘅賊人想入內爆竊，當然唔會想香港鎖好門窗。」

對於許智峯呼籲外國制裁司法、執法人員嘅行為，鄧炳強批評唔單止有機會違反《港區國安法》同埋《私隱條例》，更係卑劣、毫無人格、底線，又話香港市民應該引以為恥，直言係係「衰到冇朋友」。鄧炳強又認為，事件更凸顯23立法嘅必要性，以及保障執法人員同司法人員安全嘅重要性。

鄧炳強批評有外國政客同涉及國安案件、「走咗佬」嘅港人惡意抹黑立法工作，又指名逐一反駁佢哋嘅言論。美國駐港澳總領事梅儒瑞（Gregory May）早前指，香港正轉向中國式網絡審查，並指「香港正在開始走下坡，試圖從互聯網上刪除某些內容，並屏蔽某些網站」，佢又話有美國公司訪問香港時，要使用即棄電話同手提電腦。

作為反駁隊隊長，鄧炳強指「非法竊聽係美國嘅專長」，美國甚至會竊聽外國元首，反問「喺美國做生意係咪都要用即棄電話」，並問「你就可以非法全球監聽，我哋根據法例保障自己安全就唔得？」，佢強調香港係根據法例保障安全，形容係天經地義。

鄧炳強又引述英國外相卡梅倫（David Cameron）稱「雖然我哋國家都有危害國家安全嘅法例，但同香港唔同，因為英國制度比香港優越」。鄧炳強指對方係雙重標準，佢話根據《聯合國憲章》，每個國家地區都要因應自身政治文化社會情況，制定適合自身的社會制度，「而家唔係一百幾年前嘅帝國主義時代」。

至於日前英國廣播公司（BBC）有採訪影片，街訪香港市民都唔敢表達對23條嘅意見，更有人表示「怕犯國安法」。鄧炳強就反指「我見到嘅人，好多都話好支持23條立法」，又話「個別機構點解令到啲人唔敢去答佢問題，呢個我就好難去評論」。