中國國家統計局今日公布，2月製造業採購經理指數（PMI）為49.1%，比上月下降0.1個百分點，連續五個月落喺緊縮區間。分析指宏觀經濟政策有助改善整體環境，但要等一段時間先至可能令PMI重返擴張區間。

製造業採購經理指數（PMI）同非製造業經理人指數（NMI）都以50為榮枯線，50以上表示景氣擴張；50以下表示景氣緊縮。

綜合香港經濟日報同第一財經報導，2月PMI為49.1%，比1月下降0.1個百分點，連續五個月落入緊縮區間，而2月NMI為51.4%，比1月上升0.7個百分點，高過市場預期嘅50.7%，顯示非製造業擴張速度加快。

報導援引國家統計局服務業調查中心高級統計師趙慶河嘅分析，今年2月正值春節假期，製造業喺傳統嘅生產淡季，加上疫情防控情況穩定後，企業員工返鄉嘅人數增加，影響咗企業生產經營，製造業市場活躍度整體都有所下降。

喺企業類型分析方面，大型企業嘅PMI為50.4%，同1月持平，繼續喺擴張區間；中型企業嘅PMI為49.1%，比1月上升0.2個百分點；至於小型企業受春節影響較大，PMI為46.4%，比1月下降0.8個百分點，生產經營活動放緩。 

東方金誠首席宏觀分析師王青分析指出，短期內服務業仍然係拉動經濟增長嘅主要引擎。而家，宏觀政策正加強提振內需，3月嘅PMI指數有望改善，但要回升至擴張區間就需要一段時間。

報導又引述前海開源基金首席經濟學家楊德龍嘅指出，現時加強穩經濟增長嘅政策力度至關重要，要喺經濟復甦情況進一步加強，等市場發展趨勢確立後，投資者嘅信心亦會逐步增強。面對中小型企業相關數據下滑，佢建議應加強對佢哋嘅支持力度。