彭博社報導，美國駐港總領事梅儒瑞（Gregory May）今日接受訪問時指出，對香港嘅網絡審查同數據安全問題表示關注。佢表示有美國公司喺訪港嘅時候需要用即棄手機同電腦。佢更指「香港正在開始走下坡，試圖從互聯網上刪除某些內容，並屏蔽某些網站」，而一旦開始進行網絡審查，就可能產生滑坡效應，無結束嘅一日。

報導仲指出，香港嘅網絡服務供應商已經封鎖咗對少數網站嘅訪問，包括位於英國嘅人權組織「香港監察」嘅網站，以及刪除2019年間流行嘅抗爭歌曲《願榮光歸香港》，突顯咗出Google同Facebook等西方科技巨頭嘅營運風險。官員以國家安全為由進行呢啲行動，令人擔心，香港可能會好似中國內地，咁實施嚴格嘅控制。

梅儒瑞喺訪問中提到，要改善香港形象，應該釋放壹傳媒創辦人黎智英。黎智英因為被控「串謀勾結外國勢力」等罪名而受審。美國國務院去年 12 月曾經譴責中國對黎智英嘅起訴，呼籲北京同香港政府尊重新聞自由，同埋要求立即釋放黎智英。

梅儒瑞表示，釋放黎智英有改善香港形象嘅作用，比舉辦金融峰會同旅遊推廣活動嘅效果都要大得多。

對於香港即將通過嘅23條立法，梅儒瑞認為喺2020年實施咗嘅國安法之後，香港最唔需要嘅，就係更多廣泛嘅新罪行。佢拒絕透露美國政府對香港通過23條立法後會採取嘅行動。佢充補指，美國政府係「主動決定」唔參加港府嘅諮詢，認為應該由香港人去提出意見。

梅儒瑞表示，佢相信香港作為前英國殖民地，仍保留咗重要嘅商業優勢。佢表示，如果當局遵守1984年香港移交協議，亦即係香港50年不變，具有高度自治，咁樣香港同美國嘅關係可能會有所改善。