俄羅斯反對派領袖納瓦爾尼（Aleksey Navalny），上星期喺北極圈流放地監獄死亡，家屬仍然未能領回遺體。佢嘅母親柳德米拉（Lyudmila Navalnaya
）喺網上發布影片，表示喺當地周三傍晚，被帶到監獄附近的城鎮殮房，見到兒子嘅遺體，並已經喺納瓦爾尼嘅死亡證上簽字。

柳德米拉表示，俄羅斯當局向佢施壓，要求秘密埋葬納瓦爾尼，又對埋葬地點、時間同方式設下條件，威脅如果佢唔同意秘密埋葬，就會對遺體做啲嘢，又指時間無多，遺體正在腐爛。柳德米拉批評當局未有依法例畀佢領回遺體，反而進行非法勒索，強調自己唔會同意，希望關心納瓦爾尼嘅人，能夠親身向佢道別。克里姆林宮發言人佩斯科夫指，無睇相關影片，拒絕置評。

納瓦爾尼成立嘅反腐敗基金會負責人表示，俄羅斯聯邦調查委員會要求，只容許家屬出席葬禮，並提出另外3個條件，包括遺體要以專機運送到莫斯科，抵達前家屬唔可以公布消息，葬禮期間全程要有聯邦調查委員會嘅人員陪同，以及遺體葬喺莫斯科，或莫斯科以東嘅弗拉基米爾州。據悉，柳德米拉喺脅迫下，被迫同意喺莫斯科一個公墓舉行葬禮。

納瓦爾尼生前嘅發言人話，當局交畀柳德米拉嘅醫療報告顯示，終年47歲嘅納瓦爾尼死於自然。納瓦爾尼嘅遺孀尤利婭曾經指丈夫係被俄羅斯當局殺害，並拒絕歸還遺體，目的是要隱暪真相。

而據據《泰晤士報》報道指出，有消息指納瓦爾尼被人一拳重擊心臟而死。俄羅斯流亡人士和人權活動家奧斯切金（Vladimir Osechkin）透露，呢個係蘇聯國家安全委員會（KGB）特種部隊慣用嘅手法，佢哋訓練特務如何一拳打喺對方嘅心臟置人於死地，呢個係KGB嘅標誌。

另一邊廂，美國總統拜登昨日（22日）會晤納瓦爾尼嘅遺孀尤利婭（Yulia Navalnaya）及女兒達莎（Dasha Navalnaya），拜登對她們致以哀悼，並代表美國政府對納瓦爾尼超凡嘅勇氣、佢對抗貪腐，以及追求自由民主且法律對待眾人平等嘅俄羅斯之風範，表達敬意。

拜登其後對媒體表示，美方將公布針對普京嘅制裁，指普京要為納瓦爾尼之死負責。

美國國務卿布林肯喺巴西出席20國集團（G20）外長會議，佢指出普京迫害、毒害並監禁一個人，並唔代表俄羅斯嘅實力，反而顯示出普京治下嘅國家衰弱。

另外美國財政部副部長阿德耶莫(Wally Adeyemo） 表示，美國最新制裁目標將超過500個，呢次行動事先同其他國家協調過，將會針對俄國嘅軍工複合體，以及來自第3國、協助俄羅斯取得想要商品嘅企業。