AI盜臉吹捧中國 假帳號扮俄女直播帶貨稱想嫁中國人 烏克蘭網紅現身怒斥造假
AI盜臉吹捧中國 假帳號扮俄女直播帶貨稱想嫁中國人 烏克蘭網紅現身怒斥造假

近年人工智能(AI)科技突飛猛進,但亦衍生假資訊問題,進入眼見未必為真嘅年代。近日喺社交平台討論一名在中國直播帶貨嘅女子「娜塔莎」,佢自稱俄羅斯人,表現親中,仲話想嫁中國人。

   

自稱俄女嘅「娜塔莎」講得一口流利普通話,獲得唔少內地人追蹤,點知原來呢個喺中國生活咗8年嘅俄女,其實只係係「AI換臉」,佢偷用咗擁有娃娃臉嘅烏克蘭網紅蘿伊克(Olga Loiek)嘅外貌做直播,最近被本尊發現,喺佢嘅Youtube頻道揭曉直相。

   

蘿伊克喺社交媒體控訴「有人喺中國複製咗我(Somebody Cloned Me in China……)」,佢表示有人喺抖音、小紅書、B站等中國社交媒體,創造咗好多同佢一樣外貌嘅網紅,有啲叫「安娜」,有啲叫「娜塔莎」。佢地都有一個共通點,就係自稱係俄羅斯人、生活喺中國多年,表示中俄友誼長存、感謝中國、高喊想嫁中國男人、深深愛中國,講得一口流利中文嘅影片,但其實係AI偷用咗蘿伊克嘅臉同聲音所偽造嘅。

   

蘿伊克表示嗰啲假帳號「有我嘅臉、有我嘅聲音,仲講得一口流利嘅中文」。蘿伊克提到,呢啲影片中嘅「佢」,臉部非常唔自然,甚至有明顯嘅濾鏡。佢調查發現唔止佢嘅樣貌遭人偷用,仲有好多烏克蘭女性嘅五官都被偷用。

   

蘿伊克表示,以往曾看過有政治人物或名人被人模仿,但估唔到會發生喺自己身上,令佢感到毛骨悚然同不安。佢向各大中國社交媒體申訴反映,但隔咗好幾個星期卻都未得到回應,所以佢決定自行拍片喺佢嘅YouTube頻道上公開揭露呢件事。

     

最令蘿伊克憤怒嘅係,身為烏克蘭人嘅佢,被「偷臉」化身為俄羅斯人,除咗吹捧中國好棒棒之外,甚至提到烏俄戰爭爆發後,全世界都背棄俄羅斯,只有中國呢個真朋友願意站喺俄國身邊,一邊大讚中俄友誼長存,一邊痛罵烏克蘭。

   

據悉,由於娜塔莎以外國人身分吹捧中國,所以收穫唔少小粉紅追蹤,呢個帳號有超過14萬名粉絲,更順勢做起帶貨,賣俄國嘅嘢比中國人,其粉絲人數更遠超本尊蘿伊克嘅訂閱人數。

   

有網民分析指,從假帳號假主播嘅數量同多樣化,應該已成為一個產業。有專門嘅技術公司喺盜用真人素材同整合,推出用戶模組,畀一般人能輕鬆上手造假影片同運營。

發佈時間: 2024年02月20日 14:21
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.