俄羅斯反對派領袖納瓦爾尼（Alexei Navalny）嘅遺孀尤利婭（Yulia Navalnaya）指控總統普京政權以神經毒劑殺害其丈夫，表示會公開幕後黑手身份。佢又表示會繼承納瓦爾尼嘅遺志，繼續俄羅斯嘅自由抗爭，呼籲俄羅斯人一齊抗爭，為自由與普京戰鬥。

尤利婭喺周一發佈咗一段長約9分鐘嘅影片，質疑普京再次利用同樣嘅手法殺死納瓦爾尼，奪走咗佢嘅丈夫，試圖終結俄羅斯嘅希望、自由同埋未來。佢又質疑俄羅斯當局扣留遺體嘅動機，懷疑佢哋係想等待納瓦爾尼體內嘅神經毒劑消散。

尤利婭表示：「我哋知道係普京嘅諾維喬克毒劑，知道為何普京三日前要殺佢。我哋將會好快告訴你哋答案，絕對會揾出兇手同點樣落手下手。」

影片中，尤利婭表示繼續已故丈夫嘅遺志，為俄羅斯嘅自由同繁榮而奮鬥。佢指，即使希望渺茫，俄羅斯人仍然希望過唔同嘅生活。佢話：「我想生活喺一個自由嘅俄羅斯，希望建立一個自由嘅俄羅斯。」

翻查資料，納瓦爾尼喺2020年亦曾遭受諾維喬克神經毒劑加害。歐盟外長喺布魯塞爾舉行會議，討論就納瓦爾尼嘅死，對俄羅斯實施新制裁，尤利婭都有出席，預計制裁措施稍後出爐。

對於未有交還納瓦爾尼遺體嘅指控，克里姆林宮喺周一（19日）表示，正對納瓦爾尼死亡嘅調查正在進行中。克里姆林宮否認同納瓦爾尼嘅死有關，認為西方指普京要為佢嘅死亡負責嘅說法係不可接受。普京警告，如果外國勢力試圖干預俄羅斯大選，俄羅斯將會作出強烈反應。