美國有關人士透露，華府已向北京發出警告，若北京試圖通過向國際市場大量傾銷產品去紓解國內產能過剩問題，美國唔會袖手旁觀。美國財政部高級官員向英國《金融時報》透露，一個美國代表團最近訪問中國時，向中國當局清楚表達咗華府對中國產能過剩問題嘅關切，甚至會見中國國務院副總理何立峰時提出左呢件事。

美國財政部國際事務副部長尚柏格（Jay Shambaugh）表示：「我哋擔心中國嘅工業政策同整體經濟政策過分注重供應方面，而忽略咗需求方面，搞到產能過剩，最終會對全球市場造成衝擊。」美國最關心嘅係先進製造業，特別係潔淨能源行業，例如電動車、太陽能板同鋰電池等。

尚柏格表示，佢已經同中方講明唔止美國對呢個問題擔憂，同時中國都唔應該以為美國或其他國家嘅反應係「出人意料」。尚柏格對《金融時報》表示：「世界其他嘅國家會有反應，唔係新嘅反中行動，而係對應中國政策嘅回應。」

歐洲聯盟（EU）去年針對中國電動車產業展開反補貼調查。歐盟競爭事務執行委員維斯塔哲（Margrethe Vestager）17日表示，歐盟打算動用貿易工具對付中國唔公平嘅貿易行為。

一位美國官員表示，華府希望北京嚴肅對待呢個議題。美國財政部長耶倫（Janet Yellen）稍後今年會訪問北京，呢個將會係討論嘅主要內容。

耶倫亦將於本月喺巴西聖保羅舉行嘅20國集團（G20）財長會議上，提出中國產能過剩問題。

華府智庫「戰略暨國際研究中心」（CSIS）中國經濟專家甘思德（Scott Kennedy）指出，華府應向北京施壓，要求提高國內需求，「假設呢啲方法都唔奏效，華府將冇其他選擇，只好跟進歐盟展開調查，此舉可能實質擴大對中國進口嘅限制。」