德國福士汽車同中國上汽集團合資經營嘅上汽大眾再次被指涉及強迫勞動。綜合外媒14日報導，上汽大眾喺新疆吐魯番嘅一條測試車道涉及強迫勞動，有德國政界人士要求福士撤出新疆。綜合路透社同德國之聲嘅報導，德國福士汽車同中國上汽集團合資經營嘅上汽大眾位於新疆烏魯木齊嘅工廠於2013年開業。

路透社引述德國「商報」（Handelsblatt）指出，華盛頓共產主義受害者紀念基金會嘅高級研究員曾德恩（Adrian Zenz）提出證據，指由上汽大眾嘅子公司營運、喺新疆吐魯番嘅測試車道涉及強迫勞動。

曾德恩表示，佢喺網上發現一啲相片同聲明，包括上汽大眾喺新疆僱用嘅中國鐵路工程總公司網頁，顯示喺扶貧計畫下維吾爾族人被僱用嚟建設呢條車道，但呢個扶貧計畫被聯合國專家指係涉及強迫勞動。佢又指，佢發現中國鐵路工程總公司工人嘅相片，工人穿著軍訓制服同附有一朵紅花，係「最具強制性嘅勞動力轉移嘅典型特徵」。

德國福士嘅發言人回覆路透社表示，福士正同非控股合資企業上汽大眾商討未來喺新疆嘅業務，並會對唔同情況進行深入考慮。福士指，之前冇察覺呢條測試車道涉及侵犯人權問題。至於點解呢條車道嘅審計冇納入之前新疆烏魯木齊工廠嘅審計，福士表示，因為兩個場地由唔同聯營公司營運，唔可能一齊審計。

上汽大眾嘅新疆烏魯木齊工廠被指侵犯人權而飽受批評，去年福士委託嘅審計公司對工廠進行獨立審計調查，報告指冇發現呢工廠有強迫勞動嘅跡象。不過，曾德恩對路透社表示，福士就吐魯番車道涉及強迫勞動嘅回應並唔足夠，福士涉及強迫勞動亦唔係新事。佢話，「我認為福士應公開表示佢哋會盡快撤出新疆。」

隸屬德國綠黨嘅歐洲議會議員包瑞翰（Reinhard BÜTIKOFER）表示，「福士必須離開新疆，企業嘅商業考量亦有一條倫理嘅紅線，同推行強迫勞動嘅新疆當局同流合污，無疑越過咗呢條紅線。」

德國社民黨議員施瓦柏（Frank Schwabe）表示，新疆嘅人權狀況係「災難性同難以準確評估」，德國企業唔應該喺當地進行商業活動，「對大眾來講亦係咁。」資產管理公司德聯豐投資公司（Union Investment）喺一份聲明中表示，福士唔再符合該公司可持續基金嘅投資。

上汽同中國鐵路工程總公司暫時未有回應路透社嘅查詢。德國化工巨頭巴斯夫（BASF）不久前宣布將從位於新疆嘅兩家合資企業中撤出股份，稱「其涉及嘅行為有悖於巴斯夫嘅價值觀。」外界關注福士會唔會繼巴斯夫之後，成為另一間撤出新疆嘅德國企業。