香港政府正就有關國家安全嘅《基本法》第 23 條立法進行公眾諮詢，當中包括建議引入中國內地嘅「國家秘密」定義同立法打擊電腦作出危害國安嘅行為，引發外界憂慮。據報全球第二大嘅美國瑞生律師事務所決定，禁止香港員工瀏覽其國際數據庫，同時將設立另一個大中華區數據庫，將中港資料同國際區分。

當香港律政司長林定國在諮詢外國使領同商會後指出冇人反對23條立法之際，外資企業已經開始作出應對。根據英國《金融時報》引述兩名知情人士報道，瑞生律師事務所已經通知員工，香港員工由本月開始，除非獲得特別授權，否則唔可以瀏覽公司嘅國際數據庫。原因係香港辦公室日後一旦被搜查，執法人員只能讀取香港及中國內地嘅資料。至於公司喺美國、歐洲、中東，以至亞洲其他國家嘅資料都唔會被讀取。

為此，瑞生正將香港辦事處同亞洲其他地區嘅數據庫分割，創立另一個新嘅「大中華區數據庫」，以便香港同北京辦事處共享資料。根據瑞生網頁，該行在全球31個城市設有辦事處，喺亞洲除京港外，仲有東京、首爾同新加坡。其中一名消息人士形容，公司現在已經將香港同內地視為一體，指 23 條立法令香港嘅數據法例與內地睇齊。

翻查資料，瑞生喺中國收緊網上安全同資料保護嘅法例後，已喺去年8月關閉上海辦事處，將員工調往北京。但瑞生嘅發言人強調，關閉辦事處純粹因為租約到期，又指中國市場係該行亞洲同全球業務中不可或缺嘅一部分。

路透社喺港府公有23條立法建議時曾報道，外國銀行、對衝基金、私人研究所等機構企業，以及外交官同學者都密切關注立法，部分人士擔心法案可能會限制網路同數據營運；亦有人擔心研究中國政治、經濟同軍事，以及對中國個人同公司進行盡職調查，都可能跌入「國家秘密」嘅領域。

港府嘅 23條立法建議訂定新嘅罪行，喺明知沒有合法權限並意圖危害國家安全嘅情況下， 就某電腦或電子系統作出一啲危害(或相當可能危害)國家安全嘅行為，即屬違法。另外，港府又建議「完善」禁止竊取「國家機密」嘅條例，包括「機密」改為「秘密」，用嘅係中國嘅定義，除國防同外交之外，仲包括香港嘅經濟同社會發展，以及中港關係等資料都禁止「非授權」披露，被指幾乎係無所不包。