現金才是王道? 內地中年人棄做業主 賣樓換租屋較安心 一線城市更明顯
現金才是王道? 內地中年人棄做業主 賣樓換租屋較安心 一線城市更明顯

近期,內地樓市繼續呈現微妙轉變。拒絕「上車」嘅除咗年輕人,有數據顯示,越嚟越多嘅35歲以上嘅中年人,都重返租樓行列,佔比甚至高過25歲以下嘅年輕人。呢個情況顯示內地中年人「賣樓換租屋」嘅情況愈見普遍,而且呢個趨勢喺一線城市更為明顯,分析指供樓壓力係主因。

   

根據中國房地產行業研究平台「貝殼研究院」嘅數據顯示,內地40個重點城市租賃成交中,去年35歲以上嘅租客佔比超過35%,較2021年上升咗4.9%,比例仲多過25歲以下嘅年輕租客。

   

內地社交平台都經常出現有關「35歲賣樓攜全家租屋」、「中年租屋大改造」嘅文章。仲有啲網民表示「無樓貸一身輕,租屋自由自在」。

   

內媒《冰川思想庫》分析認為,樓貸壓力係驅使中年人轉向租屋嘅主要原因之一。好多中年人經過計算後發現,賣樓唔單止可以獲得一大筆現金,仲可以消除供樓嘅壓力,使佢哋可以更輕鬆地應對現實生活中嘅各種壓力。

   

對於呢啲中年人嚟講,將原本用嚟還貸款嘅錢拿嚟做租金,唔單止可以租到比之前居住條件更好嘅房屋,仲可以為未來幾年一家嘅生活提供一定嘅保障,減輕經濟上嘅焦慮。

   

除咗供樓壓力,內地一線城市嘅二手樓價連續三個月都有下跌,令唔少擁有房產嘅人感到擔憂。佢哋擔心二手價市繼續冷清,加上樓齡增加而導致樓價下跌,所以佢哋更傾向於盡早賣樓。

   

由於「人口老化」同「少子化」嘅社會趨勢,內地樓市嘅供求關係亦都有轉變。喺現時經濟不景嘅情況下,揸住現金會比揸磚頭更有安全感。報道引述鄭州地產中介指,由於二手樓價較前幾年跌咗兩三成,有部分業主因為供唔起樓,甚至選擇「免費送房」,只要買方願意接手房貸,房產就可以直接過戶。

發佈時間: 2024年02月07日 13:32
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.