近日，四名被香港警方懸賞通緝、身處美國嘅香港民主派人士同美國國務院官員會面，同時喺會上提出調查跨境鎮壓以及制裁推動香港基本法23條下新國安罪行立法嘅官員。

美國之音中文網今日作咗上述報導。據指出，會面時間喺美國時間5日，參與者包括香港民主委員會執行總監郭鳳儀、香港議會籌委袁弓夷、香港自由委員會基金會政策同倡議專員許穎婷同埋美國國際民主協會（National Democratic Institute）員工、有美國籍嘅邵嵐。

報導引述郭鳳儀話，「而家我哋見到『國安法』同23條，（香港政府）行使嘅權力都越嚟越大，如果美國政府到而家都未有做任何事，未作出任何實際行動上嘅回應，其實都係釋出一個好差嘅訊息，亦都會令香港政府變本加厲」。

港府宣布針對基本法第23條立法展開為期約1個月嘅公眾咨詢。新法例將涵蓋5大類罪行，包括叛國、煽惑叛變、竊取國家機密同埋間諜行為、危害國家安全嘅破壞活動以及境外干預罪等。

郭鳳儀亦都提出，美國政府需要就美國以外嘅跨境鎮壓做更多培訓同埋教育，讓政府、執法部門同埋情報機關都可以及時作出適當回應。佢又表示，參與會面嘅人或許因為工作上較為高調，受到更多關注同埋得到更多支援，但當被通緝嘅人越嚟越多，情況可能會有所改變。

佢話，「但問題係，香港政府一定會繼續將更多嘅人放喺通緝名單上，而當呢個通緝名單嘅人數越嚟越多，慢慢都會係一啲比較冇咁多資源嘅香港人受到威脅。喺呢個情況底下，就非常需要美國政府佢哋有一啲有系統嘅方法，去幫助呢啲被跨境鎮壓嘅人」。

香港民主委員會補充指出，將持續要求美國為喺美國嘅香港人提供合法地位，將而家嘅「延遲強制離境」（Deferred Enforced Departure）計畫，升級為「臨時保護身分」（Temporary Protected Status）。

舊年7月，香港警方以違反香港國安法為由懸賞100萬港幣通緝8人，包括郭鳳儀同袁弓夷；舊年12月，香港警方以同一金額通緝許穎婷同邵嵐。仲有，香港廉政公署亦以唔同原因通緝12名身處海外嘅香港政治人物，包括同樣被香港警方通緝嘅羅冠聰同許智峰。