澳籍華裔作家楊恆均遭控間諜罪判死緩 澳洲稱震驚 將傳召中國大使抗議
澳籍華裔作家楊恆均遭控間諜罪判死緩 澳洲稱震驚 將傳召中國大使抗議

據《路透社》報導,澳洲華裔作家楊恆均喺北京因被控間諜罪受審,今日(5號)被法院判處「死緩」,預計喺2年之後可能轉為終身監禁。澳洲外長黃英賢(Penny Wong)對呢個判決感到震驚,宣佈會召見中國駐澳洲大使肖千,表達反對。

   

黃英賢表示澳洲唔會喺為楊恆均爭取公義及利益方面妥協,強調「所有澳洲人都希望睇到佢同家人團聚」。楊恆均嘅家屬就對呢個「最壞嘅結果」感到震驚。

   

楊恆均於2019年1月由紐約飛嚟廣州時喺機場被拘,直到同年8月先正式被捕,被控「危害中國國家安全活動」。2021年5月,北京市第二中級法院開庭審理楊恆均嘅間諜案,期間延期宣判超過10次。

   

楊恆均,1965年出生,又名楊軍,有佢嘅復旦大學法學學士、澳洲新南威爾斯大學文學碩士、雪梨科技大學博士學位,而家係澳洲嘅時事評論家、網絡作家同學者。佢自稱「民主小販」,經常撰文批評中國,有唔少揭露時弊嘅文章喺網上流傳。

   

楊恆均嘅妻子係袁瑞娟,筆名袁小靚,之前係新浪微博上有名嘅「反美挺共」嘅意見領袖「染香」。

   

楊恆均嘅家人表示,楊恆均喺被拘留期間,遭受「超過300多次審訊」同埋「長達6個月嘅嚴刑凌虐」。

   

儘管澳洲政府多次聲援楊恆均,中國外交部就警告「尊重司法主權」,呼籲唔好干預案件。澳洲駐中國外交官舊年探訪楊恆均,知道佢有一個直徑10公分嘅囊腫,但中國當局並無立即提供治療。

   

《BBC》引述楊恆均嘅朋友、雪梨科技大學中國研究項目副教授馮崇義表示,楊恆均揭露中國侵犯人權行為,同時提倡普世價值,例如人權、民主同法治,所以受到中國政府懲罰。

   

喺北京,外交部發言人汪文斌喺例行記者會中確認咗呢個消息,汪文斌表示,人民法院喺審理案件嘅過程中嚴格依法行使職權,充分保障咗楊恆均嘅各項訴訟權利,同時尊重同落實澳方探視、獲得通知等領事權,安排澳方代表旁聽咗宣判嘅過程。

發佈時間: 2024年02月05日 16:53
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.