勒緊褲頭過年! 彭博:中國過年豬肉需求大減 反映經濟不景
勒緊褲頭過年! 彭博:中國過年豬肉需求大減 反映經濟不景

華人社會飲食習慣,好多時都離不開豬肉,所以有時會成為一種指標。農曆新年之前,理論上係消費豬肉嘅旺季,不過有外媒報導指出,由於中國嘅人工普遍減少,唔少家庭勒緊褲頭過年,縮減開支買少咗豬肉,認為暴露出中國嘅深層經濟問題。

   

《彭博社》訪咗一名喺北京新民菜市場,賣咗廿年豬肉嘅攤販吳愛珍
(Wu Aizhen,音譯)佢表示今個農曆新年唔太好,因為豬肉價格已經比一年前平咗 20%,但係銷量就比平時少咗三成。佢表示即使就快過年,今年豬肉價錢都係冇升到。

   

報道又引述另一名豬肉供應商龔誠(Gong Cheng,音譯)表示,之前係當地嘅農民工大概使一千蚊嚟買豬肉整香腸過年。但係今年佢哋只買300蚊,有啲人甚至唔買。

   

報導指出,喺過去幾個月,中國嘅豬肉需求一直低迷,即使將近過年,豬肉需求仍然冇上升。報道分析指中國勞工因為工資下降,令到好多家庭經濟不景,進而減低消費,同時亦導致供應過剩、物價下跌。

   

中國嘅豬肉消費量同豬隻產量,佔大約全球一半。然而根據上海JCI顧問公司嘅數據,舊年中國豬肉消費量減少咗約100萬噸,跌到5400萬噸。雖然雖然唔算多,但係舊年係中國疫情全面解封復常,冇報復式消費不特止,消費量仲大幅下跌就好異常。

   

同時,由於生產量卻大幅增加,加劇咗中國通脹嘅壓力。食品佔消費者物價指數(CPI)嘅五分之一,而豬肉係其中嘅重要一環。舊年12月,中國CPI已經連續第三個月下降,跌幅仲有可能延續到出年。

   

據專門研究中國農業嘅諮詢公司Sitonia Consulting市場研究總監弗里德里希(Darin Friedrichs)表示,經濟當中有好多大部分靠農民工、藍領工人消費,而企業大幅裁員嘅情況下,對佢哋有好多影響,要慳住使錢度日。

   

報道指江蘇一名餐飲業者李福民(Li Fumin,音譯)經營咗十幾間餐廳,為數以萬計嘅農民工提供餐食。佢表示,近來顧客幾乎唔點紅燒肉,只點平啲嘅蔬菜,佢表示「大家賺錢唔容易,所以客人都唔捨得食肉。」佢甚至已經唔再入牛羊等比較貴嘅肉類。

   

根據上個月公布嘅數據顯示,中國2023年嘅豬肉產量已經創下九年嚟嘅新高,然而消費需求仲係低迷,中國當局喺舊年三度干預市場,買入豬肉作為戰略儲備,藉此提升價格。

   

政策研究顧問公司 Trivium China 嘅農業分析師佩伊(Even Pay)指出,由於豬肉價格下降,部分豬農延長豬隻飼養時間,希望可以賣出較高嘅售價,咁此舉令供應進一步增加,喺需求量低嘅情況下,造成「惡性循環」。據悉南方有地區約有7成嘅小型畜牧場都被迫關閉。

   

而大型生產商亦唔好過,生豬養殖企業福建奧農生物科技集團表示,由於豬肉價格低迷搞到持續虧損,公司有可能喺幾年內下市,亦有生產商已經被收購,或者出售業務嚟籌錢。

發佈時間: 2024年02月05日 14:09
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.