美國國防部近日將10多間中國企業加入到被指與解放軍有關聯的「中國軍民融合企業」名單當中，其中包括中國最大嘅NAND快閃記憶體製造商長江存儲（YMTC）、人工智能企業曠視科技（Megvii）、依圖科技（Yitu Network Technology）同埋光學雷達（Lidar）生產商禾賽科技（Hesai）。

根據《2021財年國防預算法案》中嘅第1260H條款要求，五角大廈更新咗喺美國直接或間接運營嘅「中國軍事企業」（Chinese Military Companies）名單，反映出中國嘅軍民融合戰略。五角大樓喺周三（31日）發表嘅聲明中表示，中國透過軍民融合戰略支持解放軍嘅現代化目標，並且通過看似民間嘅中國公司、大學同研究項目來獲取先進技術同專業知識。

今次新增到名單中嘅中國企業還包括科技公司東方網力（NetPosa）、中國長江三峽集團（China Three Gorges Corp）、無人機製造商成都縱橫自動化技術股份（Chengdu JOUAV Automation Tech）、成都盟升電子技術股份（Chengdu M&S Electronics Technology）同埋貴州航宇科技（Guizhou Aviation Technical Development）等。

《路透社》報道話，被列入名單嘅中國企業唔代表佢哋會即時面對限制，但可能會加大面對美國財政部制裁嘅壓力，同時向美國企業發出警告，提醒佢哋同有關嘅中國企業做生意可能會有風險。

中國駐美大使館嘅發言人表示反對，批評美方濫用國家力量，話佢哋嘅行為同美國宣稱嘅市場競爭同國際公平貿易嘅承諾背道而馳。

喺今日嘅中國外交部例行記者會上，發言人汪文斌表示堅決反對美方將國家安全概念泛化，制定各種歧視性嘅清單，無理打壓中國企業，並且破壞中美之間正常嘅經貿合作。汪文斌又話，美國政府先係軍民融合政策嘅主推手，話美國國防部喺科技重鎮，例如硅谷，設立辦公室，指導高科技企業加快技術軍事化同實戰化。佢話好多美國大型跨國公司都係軍民融合體，佢哋嘅經營範圍同產品類型跨越咗軍民領域。

最後，汪文斌強調，中方敦促美方立即糾正上述嘅歧視性行為，為中國企業嘅經營提供一個公平、公正、非歧視嘅環境。佢話中國會繼續堅定地維護本國企業嘅正當合法權益。