李家超今日聯同律政司司長林定國同保安局局長鄧炳強，宣佈23條立法展開為期一個月嘅諮詢。據悉23條會引入新罪行，包括「境外干預罪」，加強保護國安，針對任何同外國勢力配合干預香港事務嘅行為，特別係選舉、立法同司法過程。

李家超表示，23條立法係履行香港憲制責任嘅重要一步，指出經過2019年嘅反修例事件嘅動盪，指大家都應該明白國安風險嘅嚴重性。佢表示，23條嘅立法可以彌補《港區國安法》嘅不足。佢又指立法原則會以「一國兩制」為基礎，聲稱會尊重同保障人權。23條立法係訂立全新嘅維護國家安全條例，內容包括叛亂、叛國、間諜、竊取國家機密等罪行。

關於一月嘅諮詢期比03年時短，李家超認為設計合適，佢話社會普遍對於23條立法已有共識，認為盡快將23條立法工作做好，早一天填補不足，就會少一日風險。他又話，本港同時面對境內及境外嘅國安風險，強調外國代理人及港獨思潮仍然喺香港潛伏，要防範孤狼式攻擊同潛伏性對抗。

林定國表示，制定法律維護國安係主權國家嘅固有權利。佢提到，23條立法將強化國安執法力量，有效防範同制止危害國家安全嘅活動。佢仲強調，政府高度重視人權保障，相信立法之後市民嘅基本權利會得到更好嘅保護。

鄧炳強就提到，諮詢文件涵蓋咗多個範疇，涵蓋5大類危害國家安全行為，呢啲行為喺23條中有所規定，部分係完善現有法律，有部分則係新增內容。前者如第5章涉及嘅竊取國家機密及間諜行為，係完善現有官方機密條例，包括重新定義國家秘密行為。例如「煽惑叛離罪」嘅煽惑對象，就建議由警員等擴闊至制定同執行公共政策嘅公職人員。

而新增嘅就有禁止危害國家安全嘅破壞行為、境外干預罪，如干預香港內部選舉同司法審判。仲有就係喺不誠實取用電腦嘅基礎上引入新罪行，尤其係針對透過電子系統危害國家安全嘅行為。此外，鄧炳強提到，新立法唔會盲目模仿外國法例，而係會考慮香港嘅實際情況同需要。

關於保釋規定，政府提出將參照《香港國安法》嘅標準，增強審查保釋申請嘅嚴格性。呢個做法係為咗確保涉嫌嚴重危害國家安全嘅犯罪嫌疑人，喺審判期間唔會對社會安全構成進一步嘅風險。

被問到外國政客經常就香港法院判決發聲明，會唔會違反23條？李家超指，立法為防止「有意圖」、「別有用心」嘅人，強調標準清晰。佢引述德國商會表示沒意圖危害國安，所以立法後對佢不會有影響。他認為，無論本地或外國人士有任何意見，若沒意圖危害國安便不需顧慮，普羅大眾無須擔心。

被問到會否向無議席的民主派人士諮詢時，李家超重申政府樂於接受尖銳、負面的批評。他指，諮詢層面是廣泛的，除政府官員外，相信對23條有認識的人士都會樂意向外國媒體解說，「好全面、盡力去做」。