睇住荷包變薄先識肉赤 內地青年重拾現金支付 稱更有動力儲錢
睇住荷包變薄先識肉赤 內地青年重拾現金支付 稱更有動力儲錢

近年內地電子支付大行其道,甚至好多店舖會出現無現金找贖嘅情況,小紅書亦出現過唔少內地人嚟香港玩,抱怨香港電子支付唔夠普及。不過近期內地有年輕人卻開始返熱衷於用現金消費。佢哋認為用現金消費可以令人覺得使錢會「肉赤」,幫自己慳到錢同儲錢。

   

據內地科技媒體36氪旗下嘅年輕態公眾號「後浪研究所」報道,今年26歲嘅「貝果」,佢係一名公家機關嘅文職員工,月入人民幣1萬元。喺上海,因為唔使交屋租,呢份工人對佢嚟講好夠使。

   

貝果一向鍾意見到乜鍾意就買乜,好少留意銀行淨低幾多錢。直到有一次網購時,被告知帳戶餘額不足,先開始留意到網上流行嘅「現金存錢法」。網上嘅分享人士表示,用現金消費唔單止可以確保日常開銷,仲可以有錢剩咁話。

   

喺舊年10月起,貝果每日出門都會帶銀包。而家上街購物結帳時,當店員準備掃佢手機二維碼嘅時候,佢就拎現金嚟畀錢。貝果表示,鈔票愈用愈少嘅觸感,令佢消費變得更加理性,唔再輕易喺網上亂咁買嘢。佢成功抵擋咗一啲需要掃二維碼先可以結帳嘅購物誘惑,仲每個月儲到幾千蚊。

   

雖然現金消費喺中國畀人鄙視同拋棄,但報道引述另一位受訪者,已為人母、30歲嘅Lucy,佢話一開始用現金畀錢時覺得有啲羞家,但有錢使總好過無錢使。Lucy同佢老公經營一間教培機構,雖然生意有起色,買車買樓,銀行都有啲積蓄,但近年因為投資失利,爭人200幾萬。於是佢開始養成用現金消費同儲錢嘅習慣,話呢種方式仲可以限制佢嘅開支。

   

Lucy表示,幾時發現自己冇錢,就開始用現金嘅時候。Lucy又提到,佢拎100蚊出街,就限制咗佢只可以使100蚊,從而減少咗不必要嘅開支,可以戒埋報復性消費嘅習慣。

   

報道引述一位28歲嘅木木表示,自從回歸現金消費,就閂晒所以免密碼嘅電子支付,因為佢覺得「微信裡面有錢嘅話,會忍唔住使晒佢」。佢又講現金消費嘅另一個好處,就係商家會自動「抹零」,好似22元3毫嘅商品,埋單時就會只收22蚊。

   

報導提到一篇刊登喺社會科學研究網(SSRN)嘅文章「電子支付管道對消費者消費嘅影響」(The Impact of Mobile Payment Channel on Consumer Consumption),指出電子支付弱化咗消費行為嘅心理痛感,仲無形中增加咗一般人嘅交易金額同購買頻率。

   

網傳影片「無節制消費的元凶」則話,一般人消費時冇痛感,「當時數字走咗嘅時候係冇痛感嘅…但用現金就好直觀,你錢包裡面有一叠現金,每日一張一張拎出嚟,變薄咗嘅時候,你會感覺到」。

發佈時間: 2024年01月29日 16:47
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.