愛國反日博流量竟炒車! 小粉紅指控商場裝飾辱華 遭內媒打臉:上綱上線、低級紅碰瓷
愛國反日博流量竟炒車! 小粉紅指控商場裝飾辱華 遭內媒打臉:上綱上線、低級紅碰瓷

近年嚟,中國有唔少自稱網紅或者博主,打住愛國旗號周圍生事,專門拍一啲聲稱「辱華」憤慨影片,成為流量密碼。早前日本中華料理店嘅不歡迎中國人入內事件搞出一場風波,近日又有新嘢。

   

近日南京一位網絡直播主,質疑一間商場嘅裝飾用咗日本「旭日旗」元素,仲去檢舉商場,想迫商家拆除。不過佢嘅行為就比內地媒體打臉,批評呢啲小粉紅嘅做法係惡意舉報,仲話唔鼓勵呢種「低級紅的碰瓷行為」。

   

據內媒《河南日報》旗下嘅《頂端新聞》報道,一名網名「戰馬行動」嘅中國直播主,佢將南京一個商場入面嘅紅色圓形同放射圖案,刻意局部放大,話係日本「旭日旗」,批評商家「大肆張貼、宣揚日系文化」,仲說喺官方介入後,相關廣告圖案全部拆除,商場仲被嚴重警告咁話。不過,內地網上就有網民表示,話嗰名直播主經常在上海同南京惡意舉報,靠愛國主義呢個流量密碼嚟博流量,而佢過往嘅行為,包括有指控南京一間教培機構傳播「間諜思維」,又話上海一個藝術展有「文化入侵」等。


   

報道指江蘇法德東恒律師事務所高級合夥人藍天彬律師表示,呢名男子嘅行為發泄情緒或尋求流量,將正常嘅商業行為上綱上線,擾亂社會秩序,認為係「涉嫌尋釁滋事」,依法可對其處5日以上10日以下拘留,外加500元以下罰款。佢又呼籲有關部門對於相關投訴舉報,應本著「實事求是」嘅原則處理,唔能夠跟住極端嘅社會情緒走,干涉正常商業行為。

   

報道又引述《環球時報》前總編輯胡錫進表示,呢種碰瓷絕唔係「愛國」。佢話有啲極端主義者打住愛國旗號,喺中國到處指控「西方代理人」、「文化特務」,對現實生活造成越來越大破壞,佢舉例指南京商場嘅旭日旗事件,就係「用捏造事實騙取愛國流量,進而破壞正常經濟秩序」嘅典型案例。

   

而官媒《央視》喺尋日(28日)嘅「周末談」以「愛國不是生意,舉報應有依據」為題講述呢件事件,指舉報不時淪為打擊異己、為個人牟利的工具。節目又指近年來部分居心不良嘅人,喺網上肆意捏造事實、毀人名譽。仲話有部分「正義感」、「道德感」爆棚嘅人誇大事實,破壞正常經濟秩序,為博眼球、刷「存在感」試圖刷流量成為「網路大V」。《央視》節目指出,目前現實中惡意舉報者受到嘅相應法律懲罰屈指可數,亦因為咁所以近年嚟類似案例層出不窮。

發佈時間: 2024年01月29日 12:29
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.