日經亞洲近日發表一篇分析文章，表示中國國家主席習近平嘅左右手、中共中央政治局常委嘅第二名李強同第五名蔡奇，出現權力變化。文章指由於蔡奇喺去年河北洪災中，成功保住習近平視為「千年大計」嘅雄安新區免受災害，之後更介入本由李強負責嘅金融事務，認為蔡奇嘅權力可能已經超越李強。

日經嘅分析文章表示，可以無限期延任習近平，手握中共領導人前所未有權力，黨內兩名政治局常委備受佢嘅重用，分別係國務院總理李強同中共中央書記處書記蔡奇。

不過自去年7月底至8月嘅河北洪災之後，64歲嘅李強同68歲嘅蔡奇，權力地位出現扭轉，變成蔡上李下。據悉係因為河北洪災期間，保護習近平視為「千年大計」嘅雄安新區變成首要任務，但李強無能為力，而蔡奇就成咗呢項任務。

去年5月河北洪災前，習近平曾經視察過雄安新區，當時李強同蔡奇都有同行，可見習近平極之重視。而喺洪災發生之後，當地官員極為擔憂，向李強求救。但文章指李強並無實際權力去控制涉及國家安全嘅機構，包括公安部、國家安全部、武警部隊同軍隊。由於李強無中央政府工作嘅經驗。河北洪災發生時，佢擔任總理僅僅四個月，顯得手足無措。

文章指出，當時能夠以習近平嘅名義，動用國家權力拯救雄安新區嘅人，就係蔡奇，因為佢掌管嘅機構涉及國安。文中形容蔡奇為「國安沙皇」。李強無計可施，只能求助於蔡奇。

蔡奇有豐富嘅地方政府工作經驗，包括福建同浙江，而且曾擔任過北京市長。習近平上台後不久，蔡奇轉到中央政府工作，曾任中共中央國家安全委員會辦公室常務副主任。

由於蔡奇嘅經歷，佢好熟悉北京及周邊地區嘅事務，有助佢成功挽救雄安新區。蔡奇下決定，喺距離北京較近嘅涿州附近河流，刻意截斷堤壩，令堤壩崩塌洩洪。不過文章指，呢個倉促嘅決定未有時間事先通知地方政府，造成當地多人死亡。

蔡奇成功拯救雄安新區一事顯示佢嘅權力超過李強，亦成為佢嘅一大成就。去年11月習近平視察河北受災地區時，唯一同行嘅中共政治局常委就係蔡奇。

文章進一步指出，蔡奇而家甚至參與一向由總理負責嘅金融事務。例如今年1月16日，省部級主要領導幹部推動金融高質量發展專題研討班上，習近平發表講話，由蔡奇主持開班式。至於李強就並無出席，佢當時喺瑞士出席世界經濟論壇。文章指出，一場同經濟金融相關嘅重要會議，李強竟然無份，顯得有啲奇怪。

有分析認為，習近平可能係想讓蔡奇同李強互相競爭，但顯然，蔡奇同李強之間嘅關係變得微妙。而蔡奇嘅影響力擴展到金融、甚至更廣泛嘅經濟領域，係唔尋常嘅現象。

日經呢篇文章，係由日經新聞社嘅論評撰稿人中澤克二（Katsuji Nakazawa）撰寫，佢喺中國做過七年特派記者，後來成為中國分社社長，並且係2014年范恩-上田紀念國際記者獎（Vaughn-Ueda prize）得主。