小粉紅呢次大鑊! 中國留學生威脅要斬去民主人士雙手 裁定跟蹤、恐嚇等罪成 最高可監禁5年
小粉紅呢次大鑊! 中國留學生威脅要斬去民主人士雙手 裁定跟蹤、恐嚇等罪成 最高可監禁5年

25歲中國留學生吳嘯雷(Xiaolei Wu),因為去年喺美國對參與白紙運動民主活動嘅人士進行恐嚇,尋日(25日)喺波士頓法院被判定跟蹤同恐嚇罪名成立,預計4月底判刑。每條指控最高可以判5年監禁、3年獄後監督管制同罰款25萬美元。

   

吳嘯雷喺柏克萊音樂學院(Berklee College of Music)讀書,佢不滿一名同校學生Zooey,於2022年10月喺校園內張貼含有「我哋要民主」、「同中國人民站一齊」等口號嘅海報,並且透過電郵、微信、Instagram等方法威脅Zooey同佢嘅屋企人,包括喺網上公開Zooey嘅個人信息,宣稱已經向中國政府舉報,並警告Zooey佢等畀公安拉。

   

喺周一嘅庭審陳詞中,美國助理檢察官波特(Alathea Porter)向聯邦陪審團表示,吳嘯雷喺網上威脅要斬Zooey嘅雙手,又話佢已經向中國政府舉告佢嘅「反動海報」,令Zooey覺得非常恐懼,亦擔心喺中國嘅家人。

   

吳嘯雷嘅律師坦波斯基(Michael Tumposky)表示,吳嘯雷嘅言論並無威脅Zooey,佢哋互相認識。律師話,呢件事只不過係「兩個年輕人之間嘅不成熟網絡爭執」。

   

坦波斯基表示,吳嘯雷唔係中國政府嘅特工,只係一個笨拙嘅書呆子,佢去波士頓學習爵士樂,只係用咗錯誤嘅方式談論Zooey嘅海報,同埋提醒Zooey激進主義嘅後果。

   

審訊過程中,控方喺庭上播放咗一段錄音,係Zooey同吳嘯雷之前喺波士頓一個民事法庭同法官嘅對話。錄音中,吳嘯雷認為張貼民主海報嘅行為有損包括佢在內,中國留學生嘅聲譽。佢承認使用攻擊性語言,但話呢啲係出於憤怒,無意真係採取「斬手」、「舉報」等行動。錄音中嘅法官表示,呢啲唔單止係攻擊性語言,已經構成威脅。

   

   

由於證據原件係中文,檢方請咗一位研究中國法制歷史嘅教授,向陪審團解釋「公安部」、「反動」、「舉報熱線」、「天安門」等名詞嘅含義,以及中國政府對活動人士嘅常見手段。

   

近年中國跨境鎮壓嘅例子越來越多,去年12月,美國聯邦參議院外交委員會主席卡卡(Ben Cardin)表示,全世界最複雜的跨境鎮壓活動都嚟自中國,這類行動對散居或流亡海外嘅華人,達到當地華人收聲嘅效果。

發佈時間: 2024年01月26日 13:31
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.