《人民日報》周一（22日）刊登咗篇題為《積極培養中國特色金融文化》嘅評論文章，強調要貫徹中共總書記習近平嘅講話，積極培育出中國特色嘅金融文化。文章指出，要突顯「中國特色」呢個關鍵，唔可以只圖利益，而係要做到誠實守信、先義後利，唔可以急功近利。不過，文章發表嘅同一日，中港股市齊齊下跌。

近日嘅中國股市面對新一輪嘅拋售壓力，外國投資者對北京推出刺激經濟措施嘅期望似乎已經減弱。從中美股市近期嘅表現睇，美國股市「牛氣沖天」，而中港股市就係「跌跌不休」，一直尋底。

恒生指數周一（22日）高開40點後轉跌，甚至一度跌穿15000點關口，半日跌幅達303點。全日收市報14961點。而上證指數同日低開，臨近中午收市時跌幅擴大，最多跌27點或0.96%，半日收市報2807點，跌24點或0.86%。全日以2756點收市。

前財政司司長曾俊華周日（21日）喺Facebook發文，形容香港零售業「好大鑊」。佢話香港唔可以再同人「鬥平、鬥齊、鬥多」，而係要有質素，突出香港獨特嘅品味同產品。

曾俊華提到，環顧世界各地大城市，例如東京、倫敦、紐約、巴黎同米蘭等，多年來文化同氛圍基本上冇變，而香港就似乎忘記咗自己最美嘅一面。佢指香港零售業面對嘅危機，正好係一個機會，讓大家可以轉變。

曾俊華仲話，要接受香港人北上消費嘅現實，因為去物價較便宜嘅地方購物係自然嘅事，所以香港一定要做番啲有質素嘅嘢，突出香港嘅品味同生活方式。

香港新一份《財政預算案》將於下月28日發表，外界好關注政府會唔會開徵新稅項。對此，曾俊華認為，香港而家處於經濟轉折嘅關口，唔係適合時候加稅。反而應該在支出方面「放血」，即使短期會傷身，但如果係正確嘅做法，就要有勇氣去堅持。

財政司司長陳茂波喺佢嘅網誌表示，政府會繼續密切留意經濟情況嘅最新發展，在充分考慮公共財政狀況下，盡力推出適當平衡嘅措施。目標係保持香港經濟活力，同時增強市民對經濟前景嘅信心。