據彭博報導，大部分喺中國嘅日本企業，對於2024年中國嘅前景認為唔樂觀，得25%企業預料會有改善。而華爾街日報引述大摩分析指，中國可能面臨1998年金融風暴以嚟最漫長同嚴重嘅通縮。

中國日本商會對1,713家公司進行嘅調查發現，超過400家公司表示2023年嘅投資金額較之前一年有所下降，呢個比例較去年10月嘅調查略為增加。而近400家公司指出2023年並無進行投資。只有15%嘅受訪者表示增加咗投資。

根據調查數據，外國公司對中國經濟前景嘅樂觀程度顯著下降。近40%嘅日本機械企業表示2023年投資減少，比上次調查高出5%。

商會分析指，其中一個原因係汽車行業面臨挑戰。外國汽車製造商喺中國市場競爭激烈，並且喺轉型電動汽車方面落後於中國品牌。其中三菱汽車喺舊年就宣布將退出中國市場。

至於令到企業凍結或削減投資嘅原因各有不同。有部分企業提到過度投資同擔心需求難以復原，又公司擔心脫鉤、中國嘅反間諜法同數據處理嘅規則。亦有企業表示，因為日本核廢水排海事件，令至佢嘅生意受損。

調查顯示，只有11%嘅受訪者認為2023年最後三個月，銷售有所增長，比之前一個季度有所改善，低於10月份嘅報告。45%嘅受訪者認為情況無變化，而44%表示情況變差。

對於2024年嘅經濟形勢預測，有39%嘅受訪者認為會下滑，而25%預期會有所改善，37%預計會持平。

中國將於呢個星期公佈去年第4季經濟數據，經濟學家預測同期國內生產毛額將成長1.1% ，較去年同期成長5.3%。

另一邊廂，據華爾街日報1月12日報導，摩根士丹利（Morgan Stanley，大摩）經濟學家表示，中國面對嘅通縮情況，係自1998年亞洲金融危機以來最漫長同嚴重。大摩首席中國經濟學家邢自強（Robin Xing）表示，通縮持續嘅時間越久，需要嘅刺激規模就越大，因為中國無法再依靠出口來解決經濟問題。而1月12日公布的數據顯示，中國消費者價格指數（CPI）連續第三個月呈現年減，創2009年以來最長跌勢。