中文大學校長段崇智昨日突然宣佈辭職，引發校內外一陣風波。校董會三位議員校董張宇人、劉國勳同鄧家彪今日出面回應，話推動中大改革係為咗大學嘅長遠利益，強調段校長嘅辭職純屬個人決定，唔涉及任何外力干預。

劉國勳表示：「無論係重組校董會定係之前嘅校徽事件，我哋都係以中文大學嘅最佳利益為先，全程對事唔對人。希望通過改革，提升學校管理質素，做到更加好。」佢又指上月中大前副校長吳樹培被解僱，同今次段崇智辭職係兩件事，不能混為一談。

對於段崇智嘅辭職，張宇人話：「段校長嘅決定係佢個人選擇，我哋無以任何手段逼使佢辭職。」對於有關事件可能影響中大師生士氣及學術自主嘅憂慮，張宇人表示係揣測性問題，指自己「咁嘅大年紀冇乜嘢擔心。你哋後生可能有嘢擔心。」

當被問及中大嘅「整頓」過程是否完成，張宇人指亦屬假設性嘅問題，改革冇具體嘅時間表。被問及係咪覺得「打贏咗仗」，張宇人表示：「「我咁嘅裝束點會打緊仗」，而劉國勳則補充話無人視中大為戰場，只係希望推動學校更好嘅管治。

劉國勳透露，中大會盡快開始招聘新校長嘅程序，希望新校長能領導中大繼續前進。佢估計呢個過程需要半年至九個月。同時，佢相信段崇智會係佢任期內繼續與校董會合作，保障中大嘅穩定運作。鄧家彪則感謝段崇智過去對中大嘅貢獻，並指出中大喺國際學術排名上仍保持良好水平。

此外，中大校友評議會前選任校董林偉雄，喺電台節目中表示，認為段崇智嘅辭職有一籃子嘅原因，包括上月中大前副校長吳樹培被解僱，相信段崇智會認為此例一開，對中大教職員無保障，有傳言指段崇智喺校董會會議上被指罵，認為段崇智會覺得唔高興。至於早前立法會審議中大校董會改革，段崇智沒有出席會議備受指責，林偉雄認為，立法會當時並沒有直接邀請段崇智到立法會「解話」，對段崇智的指責並不公平。

林偉雄認為，如果未來嘅中大校長候選人，知道自己可能面對同段崇智相似嘅待遇，工作上要完全配合校董會，招聘過程將會有困難。

《明報》訪問中大前副校長黃乃正，佢批評「有人玩政治玩到咁」認段辭職係「士可殺不可辱」，又指香港想成為國際創科中心「唔好發夢，對校長咁嘅態度，邊有叻人肯嚟香港做校長？」

佢又質疑，校董會愈來愈介入大學運作，主席更視自己為大學一把手，凡事要同佢報告，令校長更難做。佢指大學校長原本地位崇高，但如今是極左思潮下，「無『黃』嘅人、無人好打，『藍色打藍色』」。

至於網民對於幾位議員校董「無用手段」嘅言論，就覺得「此地無銀」「講完有冇笑到？」「20蚊張咁緊衝出嚟解釋做乜X啫？」「係20張口中說出"尊重"二字，本人覺得特別有說服力」「不是打仗是批鬥」「點解啲人自己對號入座？」