警務處去年5月實施嘅新政策，放寬警員入職要求，引起社會廣泛討論。其中，新增加嘅中英文筆試成為關注焦點。呢項措施旨在為無法喺中學文憑試（DSE）中、英文科取得2級或以上成績嘅考生，提供另一種符合語文能力要求嘅途徑。

根據保安局喺立法會提供嘅資料，截至去年底，共有87人同623人應考警員中文同英文筆試，其中14人同時應考兩者，合格人數分別為43人同172人。換言之，去年嘅警員中文同英文筆試合格率分別為49.4%同27.6%。

鄧炳強喺立法會回應表示，放寬入職條件後，投考人數有明顯增加，平均每月投考警員、見習督察同輔警嘅人數分別上升到644人、478人同283人，分別較調整前增加80%、90%同55%。佢強調，即使取消身高限制，但體能要求並無下調，考生仍需通過體能測驗。

至於中英文筆試合格率低問題，鄧炳強表示投考警員嘅語文要求並無降低，合格率反映好多未必有DSE學歷嘅人，都未必過到測試，認為證明測試有「守門口」作用。

民建聯嘅黃俊碩議員表達咗對警員質素下降嘅擔憂。佢又提到有內地旅客喺社交媒體投訴，話喺除夕夜畀警員指罵，話「唔識廣東話就唔好嚟香港啦！」對於呢啲指控，保安局局長鄧炳強表示，如果屬實，就係「不能接受」嘅行為，佢話對香港市民、對任何遊客都好，都要有良好正確態度。佢強調警員訓練中嘅待人接物、態度同禮貌係訓練重點之一。

對於投考警員筆試合格低問題，有網民表示「建議MC 題目只有2選1，提高合格率」「即是應徵者語文水平低或者試卷太深， 建議降低標準，期待合格率80% 以上」「27%呢個數字同新一屆區選投票率一樣喎，喺政府眼中一定好滿意了」「點解要考英文，應該要考普通話」，亦有人指鄧局長「呢位先生把口真了不起！臭都可以講成香」「掩耳盜鈴嘅說法非常好喔！」