中國去年對美國嘅出口金額大減超過20%，17年嚟首次唔再係美國最大嘅進口國。分析家指，美國轉向其他友好國家採購嘅趨勢非常明顯。去年7月，中國海關總署公佈每個月嘅進出口金額後，唔少中國財經媒體就指出，中國已經唔係美國第一大進口國。

根據日經中文網嘅報導，美國商務部嘅貿易統計顯示，自2006年以嚟，中國首次年度占比跌到第二位以下。2023年1月至11月，中國喺美國進口總體中占比13.9%，係2004年嚟最低。美國自中國嘅進口喺2017年左右達到高峰，當時嘅比例超過21%，同其他國家拉開咗好大嘅差距。

有分析指出，2018年開始嘅中美貿易戰導致兩國貿易額持續下滑，中國唔再係美國嘅最大貿易伙伴。2020年全球疫情爆發，中國率先復工，再次成為美國嘅最大貿易國。不過隨著疫情之後美國減少對中國依賴、全球供應鏈調整，美國自中國嘅進口商品規模又減少，兩國貿易額再次下降。

取代中國地位嘅係墨西哥。2023年，美國自墨西哥嘅進口額有望刷新歷史新高。自2000年以來，墨西哥對美國出口占比首次成為第一位。日經中文網引述美國智庫大西洋理事會嘅葛蘭姆（Niels Graham）話：「雖然規模唔大，但中國廠商喺墨西哥嘅工廠進行最終生產，試圖出口去美國嘅例子係存在嘅。」

報導提到，喺美國推動「友岸外包」、維持對中國進口產品高關稅情況下，美國向歐洲同東南亞嘅進口增加。

喺電子產品等之前較依賴中國，美國向其他國家轉移嘅趨勢擴大。例如智能手機，1至11月自中國進口減少咗1成，而自印度進口則增加咗5倍。手提電腦方面，美國自中國進口減少咗3成，越南則增加咗4倍。雖然自東南亞嘅採購規模仲好細，但正快速增加。

不過，報導指出，要擺脫對中國嘅依賴唔容易。隨著美國國內電動車普及，鋰離子電池嘅進口猛增，依賴度達到7成。而智能手機同遊戲機相關進口雖然趨於減少，但依然占7至8成。