官媒《環球時報》報道，最近出現多宗中國留學生入境美國時，被長時間查問、要檢查手機等電子裝置，甚至有人被註銷簽證。中國駐美國大使館嘅官員批評，指呢種歧視性做法，嚴重破壞中美正常人文交流和教育合作，不得人心，損人不利己。

據《環時》報道，留學生T某係耶魯大學博士生，本科為北京某間一流大學。報道指佢喺舊年12月19日由中國返美，喺華盛頓附近嘅杜勒斯機場入境。機場海關詢問T某嘅所學專業後，就將佢帶到「黑房」，盤查長達8小時，重點詢問其本科在校期間，有冇獲得獎學金、有冇受到中國政府資助等，而且仲檢查佢嘅手機電腦等隨身電子裝置。然而喺盤查結束後，執法人員就告知T某，已經註銷佢嘅留學F-1簽證，而且5年內不得入境美國，仲冇交待註銷原因。

而另一個中國留學生M某，亦都有類似嘅遭遇。M某喺2022年前往美國國立衛生研究院國家癌症中心展開研究，佢喺美國期間無任何違法違紀行為。2023年11月22日，M某喺杜勒斯機場入境，被帶往「黑房」進行盤查，佢被問本科專業方向、導師信息、目前研究內容，有冇受國家留學基金委資助，科研項目係咪同中國政府等有關。最後佢嘅F-1簽證亦被註銷，而且執法人員表示M某嘅簽證，係美國國務院直接取消，美國海關同邊境保護局無權查看取消原因。

對此，中國駐美國大使館回應稱，美方針對特定國家留學生的歧視性做法，同美方自我標榜嘅開放自由等理念背道而馳，同開展國際人才交流嘅時代潮流背道而馳，同兩國人民開展友好交流嘅共同願望，以及兩國元首近日舊金山會晤共識精神背道而馳。

大使館又稱中方敦促美方立即停止泛化國家安全概念，停止無端遣返、盤查、滋擾中國赴美留學人員，停止侵犯中國公民合法權益，確保此類事件不再發生，為中美人文交流與教育合作營造良好氛圍。

根據《2023年美國門戶開放報告》，過去3年，來自中國的學生總數有所減少。2022至2023學年有28萬幾名中國學生就讀美國大學，是自2013至2014學年以來新低。

對於事件，有內地網民喺微博表示：「藍星唯一超級大國，越來越不自信，越來越不包容了」「那就抵制美國執法人員唄，禁止所有美國執法人員入境中國」，亦有人怪留學生：「美國那麼壞，為什麼要去？」「好虛偽的，天天罵還要去」