中國疫後經濟未能如外界預期般復甦，而且持續不振，令外界質疑中國當局能否有效應對。《金融時報》報道，統計數據指有九成於2023年流入中國股市嘅外資已撤離，而《日經亞洲》嘅報道指出，呢啲資金轉而湧向印度同南韓市場。

據《金融時報》嘅分析，外資流出嘅主因係對中國經濟前景嘅普遍憂慮。今年8月，中國房地產行業嘅巨頭碧桂園發生債券違約事件，凸顯咗行業嘅流動性危機。呢次風波令投資者信心嚴重受挫，引發咗一波外資大量撤離嘅潮流。

統計顯示，截至8月，外資對中國股市嘅淨投資額曾達到2350億元人民幣（約330億美元）嘅高峰。但呢個數字喺短短幾個月之內急劇減少87%，迄今僅剩307億元人民幣，創下自2015年滬深港通開通以來嘅最低水平。

分析師指，中國股市嘅表現一直遠遠落後於全球市場。即使北京方面推出咗一連串經濟刺激措施，同埋美中關係有所改善嘅跡象，都未能令投資者回復信心。此外，中國嘅救市動作，例如上市公司大規模回購股票同國有金融機構嘅積極買入，反而加快咗外資嘅流出。

報道引述香港嘅交易員表示，全球各地投資者都對中國股市特別警惕，自從一年前因期待北局會解除動態清零政策嘅反彈，引發嘅買盤激增以來，投資者對中國股市幾完全無興趣。而今年下半年內房股連接爆雷後，投資者對中國股市更加睇淡。

另外，根據《日經亞洲》嘅報導，國際金融協會（IIF）嘅數據顯示，今年截至12月19日，外資從中國股債市場合計淨流出達845億美元，較去年增長44%。

報道指從中國撤走嘅外資大多轉向印度同南韓。報導指出，今年流入印度嘅外資達到2017年以來嘅最高水平，而流入南韓嘅資金約為300億美元，係2022年嘅兩倍。

就全球股市嘅表現而言，今年中國嘅滬深300指數下跌咗11.8%，而印度嘅Sensex指數升咗19%，南韓綜合指數升咗18.7%，美國標普500指數則升咗24.5%。