中國14屆全國政協第12次主席會議27日喺北京召開，決定撤銷3名軍工巨頭吳燕生、劉石泉、王長青嘅全國政協委員資格。星島日報引述消息透露，吳燕生等3人捲入中國火箭軍腐敗案，涉及軍事裝備採購，已被撤職嘅中國前國防部長李尚福都有牽涉。公開資料顯示，吳燕生、劉石泉、王長青3人唔單止係中國國企高管，仲係軍工方面嘅專家學者。

吳燕生畢業於中共運載火箭技術研究院第一設計部，擁有工學博士，係研究員，國際宇航科學院院士。之前做過航天科技集團總經理等職，2018年5月任中國航天科技集團董事長。中國航天科技集團有限公司（CASC）業務包括發射太空飛行器、載人飛船、人造衛星同埋戰略、戰術飛彈等，「神舟」系列載人飛船同「長征」系列運載火箭係公司出名嘅產品。

劉石泉畢業於華中理工大學固體力學專業，擁有碩士學位，係研究員。之前做過航天科工集團總經理等職，2022年5月任中國兵器工業集團董事長。中國兵器工業集主要從事軍事裝備研發、生產、製造，產品包括ZTZ-99主戰坦克、PLZ-45自走砲。

王長青擁有工學博士學位，之前做過航天科工集團三院院長等職，2023年6月任中國航天科工集團副總經理。中國航天科工集團（CASIC）主要涉及飛彈武器系統嘅研發同製造，以及微型衛星技術、固體運載火箭同訊息技術嘅研發。

今年7月，中國火箭軍傳出集體腐敗案，前火箭軍司令員李玉超被免職，仲有多名火箭軍高層涉案。中國國防部嘅軍委裝備發展部亦係重災區，中國前國防部長、曾任裝備發展部部長嘅李尚福都有牽涉，被免去國防部長。

李尚福8月29日喺北京出席第3屆中非和平安全論壇後就冇再公開露面，消失喺公開場合近兩個月之後，中國全國人民代表大會常務委員會10月24日開會決議，正式拔除李尚福嘅國務委員、國防部長，以及國家中央軍事委員會委員職務，成為繼中國前外交部長秦剛之後，中國3個月內第2位被拔官嘅副國級官員。

中國火箭軍係戰略飛彈部隊，喺共軍可能攻台嘅行動中會擔當重要角色，今年中國火箭軍高層傳出涉案遭集體整肅、迄今已逮捕至少70人，火箭軍高層多名將領連續被撤換，改由解放軍其他軍種將領接管。外界分析，呢個舉動顯示北京要求「政治忠誠」仲優先於推動軍隊現代化，恐怕會令到火箭軍能力提升嘅努力受挫。