「勸大家唔好再過嚟，喺國內搵份工好好做，都可以賺到咁多錢」，但最後，以志願軍身份遠赴俄烏戰場嘅重慶男子趙睿就永遠返唔到屋企。《鳳凰衛視》戰地記者盧宇光上周喺社交媒體上確認，趙睿喺今個月初被烏克蘭無人機炸死，成為首名公開身份嘅陣亡中國籍士兵。

同趙睿一齊戰鬥、嚟自廣東湛江嘅周志強表示，佢哋兩個喺11月29號被派去扎波羅熱州新普羅波夫卡前線作戰，當日趙睿就死喺戰場上。報道指出，38歲嘅趙睿未婚，父母都退休咗，2013年曾經去緬甸加入當地少數民族武裝緬北同盟軍，係嗰度識咗周志強。

趙睿嘅爺爺曾經以地下工作者身份參加抗日戰爭。趙睿知道俄國喺全球招募志願軍之後，起咗個念頭，覺得加入俄軍可以喺烏克蘭戰場打日本人，於是決定用兩個月時間減肥，又邀咗周志強一齊去。起初周志強唔想去，因為佢32歲，已經結婚，有個女兒，佢太太唔想佢上前線賣命，但係被每月大約2萬元人民幣嘅工資吸引。周志強講，佢唔討厭美國或者俄羅斯，亦都唔討厭烏克蘭，純粹只係為咗賺錢養家。

兩人拎咗旅遊簽證，由成都飛往莫斯科，喺徵兵站報名後接受咗15天軍事訓練，跟住佢哋就加入咗第58集團軍嘅外籍排。喺俄羅斯期間，趙睿喺抖音帳號「錢龍皇帝」上載咗好多條影片，記錄咗佢喺俄軍經歷嘅艱苦環境、士氣低落同慘重嘅傷亡。喺其中一條影片裡，佢講咗佢好想返屋企，勸其他人唔好再嚟，佢仲講佢好耐冇食到家鄉嘅菜，佢都想返去。

11月29日，趙睿同周志強所屬嘅部隊被派去新普羅波夫卡前線。出發之前，趙睿打咗個電話畀屋企人，交代咗後事。戰鬥期間，烏克蘭派出好多架無人機進行轟炸，導致俄軍傷亡慘重。嗰日下晝4點，周志強發現趙睿倒喺戰壕邊，滿身係血，當場就證實佢死咗。周志強喺趙睿身上攞走咗啲證件同其他嘢，雖然佢受咗傷，但佢多次成功「扮死」，爬咗五六個鐘頭終於穿過咗烏軍射擊帶，返到咗俄軍陣地。