說好的搶企業呢? 外資撤離香港 駐港地區總部創近11年新低
說好的搶企業呢? 外資撤離香港 駐港地區總部創近11年新低

香港政府統計處嘅最新數據顯示,今年只有1336家境外公司將香港設為地區總部,比2019年減少13.3%,係自2012年以來最少。根據21日發布嘅境外母公司嘅駐港公司年度統計調查報告,境外公司喺港嘅總數為9039間,2019年則有9040間。


   

當中地區總部嘅數目,從2012年嘅1367間,增至2019年嘅最高點1541間,之後數目逐年下降,至2023年僅餘1336間,按年減少75間(5.3%)。而中國公司嘅地區總部喺香港最多,達247間,其次係美國公司214間、日本公司206間。

   

近年來,來自美國、日本同英國嘅公司喺港設立嘅地區總部數量亦有所減少。美國公司從2019年嘅278間減至2023年嘅214間,日本公司由232間減至206間,英國公司則由141間減至115間。

   

報告指出,公司選擇香港作為地區總部,主要原因包括簡單嘅稅制同低稅率、資訊流通自由、政府廉潔、法治同政治穩定。然而,61%嘅受訪公司表示未來三年計劃喺港嘅業務維持不變,13%計劃擴充,而有15%未能確定未來計劃,3%則考慮逐步終止或遷移部分或全部業務。

   

另外,政府指出,投資推廣署今年首11個月已吸引351間海外和內地企業在港設立或擴展業務,按年增加30%。

   

自2020年實施港區國安法以來,香港除咗出現移民潮,外資亦有撤離跡象。《華爾街日報》指出,香港同中國大陸嘅聯繫曾經係跨國企業嘅優勢,但現已變成負累,令到銀行、投資公司同科技企業開始大規模撤離。

   

上個月新加坡《海峽時報》更有專題報道《再見香港,你好新加坡》,講點解航空物流同金融跨國企業都陸續棄港移星,分析指呢個係實務選擇,更指新加坡可以掌握自己嘅命運,而香港嘅命運,就掌握喺北京手中。

   

今年十月施政報告,李家超表示會引入公司遷冊機制,便利喺外地註冊嘅公司,遷冊到香港。同時港交所會主動接觸喺外地註冊嘅香港主要上市公司,鼓勵佢哋遷冊到香港。不過政策明年上半年先會提交到立法會,到時又能唔能夠扭轉局面呢?

發佈時間: 2023年12月23日 17:17
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.