官媒《環球時報》前總編胡錫進喺今年6月26日高調宣佈入市炒A股，引起一時熱話，開始時佢以本金10萬元人民幣，仲不斷加碼，直至9月7日，佢透露本金達到47萬元人民幣，已全部滿倉。但係，上周五（15日）佢指自己虧損已達到4.23萬元人民幣，蝕近一成。同時當日參加一場會議，旁邊嘅女教授指自己8年進股市，本金60萬元，而家只剩低唔夠20萬元，只能要求「自己把股市忘了」。

胡錫進總結指，感覺股市而家真係深冬，以致於好多人唔敢相信（A股）仲會有下一個春天。不過，胡錫進開設嘅炒股日記平台，每篇閱讀量都能達到數百萬以上，流量賺到嘅錢，可能已經夠冚返炒股蝕錢嗰條數，真係蝕入肉嘅係跟佢入市嘅小股民。

中金在線財經號作者邱林發文評論，「這種心態崩潰的現象在股市中並非罕見」、「胡錫進沒有炒股的命，卻得了炒股的病」、「每天秀賺了、虧了，很像有些網紅每天曬照片博眼球，其實很無聊」，仲話胡錫進炒股只係一個做下樣，主要都係炒新聞同蹭流量。

邱林指，胡錫進「與各大社群網路平台簽約，開設炒股專欄，每天發布自己的炒股日記，每篇的閱讀量都達到了數百萬以上甚至上千萬。」有網友表示，比對自己嘅帳戶，笑著笑著就喊出嚟；亦有網友話，自己係因為胡錫進先市，冇諗到變大閘蟹收場。

今年中國政府當局推出多項振興經濟措施，但中國股市依舊跌唔停。今年以來至12月15日，滬深300指數下跌13.8%，香港恆生指數下跌15.1%，喺全球主要股市中表現墊底。

值得留意嘅係，中國社交媒體微博喺上周通知咗網紅唔可以發表唱衰經濟嘅言論，否則將會觸及紅線。而中國國家安全部亦發文明確表示要「堅決築牢經濟安全屏障」，強調經濟安全係國家安全嘅重要組成部分，並且揚言要打擊懲治經濟安全領域危害國家安全嘅違法犯罪活動。唔知胡錫進咁嘅發言有冇違反國安呢？

另一邊廂，近日新華社報道指，中共中央財經委員會辦公室（中央財辦）針對中國經濟未來走勢作出回應。中央財辦表示，儘管面臨挑戰，但明年中國經濟的機遇將大於挑戰，且有利條件將強於不利因素，又強調中國經濟的長期向好趨勢未變，並呼籲增強信心同底氣。

報道指，中共中央經濟工作會議對今年經濟工作進行了全面總結，指出經濟增速保持較高水平，就業情況穩定，物價較低，並預計今年主要經濟目標能夠實現。

中央財辦指出，國際環境雖然存在不確定性，但中國的經濟大循環仍然面臨一啲挑戰，如有效需求不足、新興行業過度競爭同風險隱患等。不過，佢地認為中國經濟仍有諸多發展機遇。中國市場規模巨大，社會預期逐步改善，高儲蓄將轉化為消費和投資。

而且宏觀政策將繼續支撐經濟恢復。中央財辦提到，今年增發的人民幣1萬億元國債，以及降準、降息、減稅降費等政策，將在明年持續發揮作用，並將推出新嘅政策措施。