奉李家超籲專介紹男女朋友 高才通協會搞相睇大會 孫玉菡:各項輸入人才計劃至今逾8.1萬人抵港
奉李家超籲專介紹男女朋友 高才通協會搞相睇大會 孫玉菡:各項輸入人才計劃至今逾8.1萬人抵港

本港近年因移民潮出現人力短缺,港府由舊年推「高端人才通行證計劃」搶人才,有報導指申請者九成都係內地人。另外數字顯示,高才通已批出逾4.8萬宗申請中,超過1.7萬人未婚,佔整體約37.5%。

   

嚟香港嘅單身專才比例唔低,點樣留住人才喺香港呢?特首李家超曾經講過,「如果可以介紹男朋友、女朋友畀佢哋就更加好」。香港高才通人才服務協會即刻響應,今日(15日)將會舉行高才「相親大會」。協會理事會會長立法會尚海龍透露,活動有創科公司董事長報名。

   

尚海龍指目前有接近100人報名,有新嚟港嘅高才,亦都有土生土長嘅香港人或者喺香港住咗好多年嘅「港漂」。獲批嘅高才當中,雖然男高才人數(29,254人)多過女高才(18,427人),尚海龍指報名人數陰盛陽衰,「而家有廿幾位男士報名,另外近80人都係女士。希望多啲單身男士報名。」

   

而且呢個相睇大會唔只係普通見面、食餐飯咁簡單。尚海龍表示,協會搵咗專業公司設計咗一啲破冰遊戲,有唔同環節讓男女嘉賓互相了解多啲,活動將會由下晝3點,一直進行到晚上9點。

   

根據協會提供嘅資料,參加活動嘅人當中有生物科技公司總裁;畢業於美國約翰霍普金斯大學、喺銀行任職嘅85後金融碩士;畢業於北大嘅大學教師;有名列2020福布斯中國30歲以下青年精英榜嘅人士;任職投行分析師嘅90後;兼任銀行職員嘅美食網紅、前TVB普通話新聞主播等等。

   

特首李家超上個月出席香港高才通人才服務協會創立活動時,曾呼籲佢哋向新嚟香港嘅專才分享自己嘅經驗,鼓勵佢哋喺香港落地生根,佢仲講:「如果可以介紹男朋友、女朋友畀佢哋就更加好。」佢又祝願各位人才喺香港「一帆風順,百子千孫,生活愉快」。

   

另一方面,勞工及福利局局長孫玉菡書面日前回覆立法會議員質詢時指,政府各項招攬各地人才措施,喺去年底推出以來反應良好。截至11月底,各項輸入人才計劃共收到超過20萬宗申請,接近去年申請數目嘅4倍,當中超過12萬宗獲批。而首11個月,就有超過8.1萬人抵港,遠超每年引入3.5萬名人才嘅目標,而當中最多來自「高才通」。

   

孫玉菡指,香港人才服務辦公室10月底成立後隨即開展工作,人才辦總監正積極為主要服務訂立KPI(績效指標)同服務承諾,並將於明年第1季公佈。

    

對於相睇大會,有網民睇完覺得好多報名人士嘅相都係P圖,表示「照騙算唔算犯商品說明條例?」亦有人指「我見到外國對新移民都係會有一啲支援嘅,例如語言教學,適應當地文化嘅課程,幫你搵工等等。 但係我從來冇聽過一啲國家會幫新移民搵男女朋友囉」,亦有人質疑「幾個女的經驗及學歷普通,這就是高才通?」

發佈時間: 2023年12月15日 13:08
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.