首宗港區國安法案件被判刑9年，正在服刑嘅唐英傑，尋晚喺無綫嘅國安節目亮相，佢表示犯案因為受社會氣氛影響思有偏差，又話入獄最難受係失去跟家人相處嘅時光。節目又話唐英傑參加咗懲敎署嘅更生計劃，佢仲擔任升旗手了解國旗國歌意義。

無綫翡翠台昨晚播出《有法安國》嘅國安法資訊節目，一輯共12集，唐英傑壓軸成為最後一集嘅「主角」。

現年26歲嘅唐英傑，喺2020年7月1日即「國安法」生效當日，駕駛插有「光時」旗幟嘅電單車，駛經警方防線並撞向三名警員被，佢被控「煽動他人分裂國家」同「恐怖活動」，成為《香港國安法》實施後首個被檢控嘅人，及後罪成，喺2021年7月30日判囚9年。

片中唐英傑表達入獄後嘅感受，佢指當時犯案受到社會事件影響，「諗埋咗一邊，嗰個思緒呀，被當其時嘅社會氣氛影響咗，會覺得除咗用暴力，好似解決唔到問題，當時純粹興起嘅」。佢又表示：「原來係一個好嚴重嘅罪名，係可以終身監禁。」

對於失去自由，唐英傑喺節目中稱最難受嘅，就係冇咗同家人相聚嘅時光，佢表示有一個年紀比較大嘅婆婆，當佢出獄嘅時候，可能已經唔係度。佢又話「其實我真係懲罰緊我身邊嘅人」。

節目提到唐英傑喺獄中參加懲敎署嘅「沿途有『理』」更生計劃，包括當中嘅「『招』『職』創未來」計劃，佢表示希望成為跳傘同潛水教練。

唐英傑入讀為成年在囚人士開辦嘅立德學院，完成課程後等同中學文憑試五科合格，節目表示喺學院成立儀式上，唐英傑擔任升旗手，「了解國旗國歌當中嘅意義」。

早前《有法安國》節目，亦都搵咗喺2019年十一國慶示威，喺荃灣中槍少年曾志健（健仔），片中健仔話因氛圍越嚟越激烈，令佢越走越前，同樣提到參加咗懲教署嘅更生計劃，學習管理情緒，「避免畀人煽動同唆擺，最後承擔後果就只係自己同家人」。