美國準副國務卿坎貝爾 踢爆未邀請李家超出席APEC 並稱李屬「不受歡迎人物」
美國準副國務卿坎貝爾 踢爆未邀請李家超出席APEC 並稱李屬「不受歡迎人物」

白宮印太事務協調官坎貝爾喺國會聽證會上表示,美國拜登政府從未邀請香港特首李家超參加上個月喺舊金山舉行嘅APEC峰會,並直指李家超係「不受歡迎人物」。

   

美國總統拜登喺上個月2號提名坎貝爾(Kurt Campbell)提名做美國副國務卿,接替7月底退休嘅舍曼(Wendy Sherman)。


   

據美國之音報道,坎貝爾喺尋日出席參議院外交關係委員會嘅人事提名聽證會。聽證會期間,共和黨籍議員里施(Jim Risch)喺聽證會上問美國係咪曾邀請李家超參加APEC。坎貝爾表示清楚向中國同香港政府表明,李家超係不受歡迎人物。佢要派第二人選參加APEC,而最終佢都係唯有咁做。佢又強調華府「從未計劃畀佢參加(APEC)。」

   

翻查資料,港府喺10月31號曾表示,已經按照慣例收到APEC峰會主辦國嘅邀請函,但李家超「因為行程安排未能出席」。當時港府冇講明,美國係咪指名邀請非李家超以外嘅代表。

   

特區政府話,「中國香港已按慣例收到東道主邀請」,而喺回應傳媒查詢時又話,「特區政府確認行政長官李家超本人已收到美方發出嘅與會邀請」。但李家超因為日程原因,未能親自代表中國香港出席會議,所以委派財政司司長陳茂波代表出席。

   

而中國外交部發言人汪文斌喺11月1號嘅記者會中,亦都表示李家超已收到邀請函。

   

關於今次事件,網民就強力恥笑,有人表示「我唔信我既偉大既李長官會講大話囉」「又要強烈譴責」「好X肉酸,被人咁叫真係慘過去死」「隔咗咁多日先至揚出嚟算係咁啦,唔係嗰日open day即時落佢面」「唔知佢有冇覺想搵窿捐呢?」

   

另外,坎貝爾喺聽證會上同時呼籲國會議員,通過拜登政府有關印太地區嘅戰略預算,當中包括「與台灣站在一起」同「支持菲律賓」。

   

坎貝爾周四亦特別提出美國對帛琉、馬紹爾群島同密克羅尼西亞等太平洋島國嘅新資助計劃。坎貝爾提出警告,話如果美國唔履行承諾,中國就會趁虛而入。

發佈時間: 2023年12月08日 16:48
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.