周焯華（綽號洗米華），因為巨額詐騙罪、黑社會罪、不法博彩等罪名，喺澳門被判監禁。根據《亞博匯》報導，周焯華喺11月24日寫咗《如果能給習近平國家主席寫一封信》。喺信入面，佢話喺澳門經營咗14年，所有罪名加埋獲判121年監禁。佢堅稱冇同客戶有非業務往來，並且話發信唔係有冒犯之意，只係情非得已，只想有個公平同正常嘅裁決。

周焯華話自己喺澳門本來只係一個寂寂無名嘅人，因為澳門回歸後，有賴中央政策帶動先有今日嘅成就。佢哋喺當時嘅澳門政府同中聯辦嘅鼓勵同引導下，引進專業管理，建立企業使命、品牌價值同社會責任等。

佢仲講到，行業本身都存在唔少問題，多年來佢都寫過幾篇文章勸籲同業唔好因底面而過度放貸，但行業整個運作模式十幾年黎幾乎一樣，佢反問點解今日嘅反差會咁大，並且之前毫無預警或設紅線。周焯華話自己成日都會返辦公室上班，冇同客戶有非業務上嘅往來，唔收取客戶任何金錢同禮物，冇權限動用公司任何資金。佢話咁嘅工作模式同方針維持超過十年，直到2021年11月26日佢被澳門司警帶走，罪名係黑社會犯罪、網賭，最後一審判咗佢18年刑期，最近中級法院上訴刑期唔變。

喺信中，佢因應黑社會嘅指控，話整個審訊過程冇證據證明佢指揮過其他被告從事嘅不法活動，亦冇證人、證供、文件證明任何被告曾經收過非法得益。多年來嘅手機紀錄同所有嘅會議紀錄顯示，佢哋從來冇傾過任何底面業務。員工亦冇收過犯罪利益，冇犯罪動機，佢反問點會構成黑社會犯罪。佢話作為員工嘅老闆，佢絕對冇支付過工資以外嘅金錢利益畀佢哋，如果法律容許，佢願意一力承擔所有嘅法律責任。

周焯華喺信入面仲提到，手機裡有將近十年嘅通訊紀錄，裡面從來冇同人講過組織過點放碼、收帳，冇講過資金流、利益分配，冇任何跡象顯示有人提供過利益畀佢，佢亦從來唔掂錢。而且佢話嗰個底面業務喺當時嘅現金流方面，估計僅僅佔公司現金流嘅1%至2%。

除咗會對相關人士進行一啲信貸追蹤，基本上從唔過問，所以佢質疑點樣稱得上經營賭底面。佢又強調，最近內地公安成功搗破東南亞各國多宗犯罪團伙，佢相信個人或公司同呢啲不法活動毫無關連。佢話咁樣嘅情況唔足以判處佢18年徒刑。佢仲話，成件事冇受害者，冇財物損失，冇人命傷亡，亦冇貪污腐敗，只係賭場案件。

佢最後指出，內地温州母案案情最嚴重嘅一位客人，自己口供承認有經營底面賭博，一場輸贏過億，最終喺一審嘅中級法院判決判刑7年9個月，當時嗰個犯人仲提出上訴。但係案件冇以黑社會或犯罪集團等罪名起訴。佢希望習主席能夠為幾個無辜家庭發聲，佢哋只需要一個公平同正常嘅裁決，佢話自己冇冒犯之意，只係想盡做老闆嘅責任，實在情非得已，只希望可以挽回發生喺佢哋身上嘅災難，先會咁唐突嘅方式表達。