袁國勇表示，要喺下一次傳染病大流行來臨之前做好準備，除咗研發藥物，設立疫苗平台等工作，亦要做好外防輸入，認為非疫情期間都要篩查入境旅客。

香港大學醫學院微生物學系講座教授袁國勇同港大臨床醫學院內科學系講座教授孔繁毅等4名學者今日（7日）喺報章發表文章，提出香港應對未來疫情嘅建議。

文章指出，無人能知大疫何時再臨，可能係10年、明年或者明天，建議外防輸入應由即時開始，期望港人可以採取「平時如戰時，戰時如平時」心態，一旦發生疫情，本港仍能如常運作如常

文章建議非疫情時期要嚴格篩查發熱或生病嘅入境旅客，在各邊境口岸準備好檢測設施，發燒嘅入境旅客做鼻咽拭子檢測，同埋進行常見呼吸道病原體嘅多重聚合酶鏈式反應檢測。

文章又建議私家醫院、私營診所同門診嘅防疫設備，要同公營醫院院睇齊。文章話由於私營醫療機構有營利，可以用嚟改善院內嘅感染控制硬件，如提升鮮風供應同病房換氣率，增加負壓隔離病房等。日後再遇大流行時，私院5000幾張病牀就可以轉為負壓隔離病牀，提供緩衝空間，避免公營醫療系統崩潰。

文章又呼籲提升公共衛生標準同檢測應急能力，建議醫管局同衛生署要有能力快速擴大核酸檢測嘅設備、人手同技術，以便短時間內啟動大流行模式。

現時本港嘅疫苗接種率低，團隊認為主要同疫苗猶豫有關。團隊指喺第五波疫情之前，錯誤信息廣泛流傳，資訊混亂，導致市民對接種疫苗唔信任政府。當時疫苗剛推出市場，科學數據有限，而解說追唔上謠言，令長者、長期病患者卻步，未能及時接種，導致大量老弱染疫逝世。

文章認為要加強市民嘅認知水平，提高健康衛生意識，建立抗疫韌性，使市民自願配合防疫措施，抗疫工作先可以事半功倍。

文章亦提出建議，研究逐漸淘汰舊式安老院，重新定下硬件標準，並為新建高層住宅訂立防疫標準，以應對未來可能嘅大疫症。