由於抖音盛行，連帶內地流行嘅事物都會喺香港流行。近期內地大熱嘅玩具「蘿蔔刀」，就流入本港。呢款蘿蔔刀利用自身重力，可以甩出蘿蔔刀嘅本體，類似摺叠刀咁嘅設計，產品喺內地好受歡迎，喺香港都可以透過唔同網購。有議員關注呢啲玩具，玩耍時有可能會傷害他人，可能會影響學生安全，又指有啲賣家嘅推銷手法涉嫌煽動暴力，政府表示玩具符合歐洲安全標準。

教育界立法會議員、身兼校長嘅朱國強，今日（6日）喺立法會會議提出口頭質詢，指香港有學校發現學生課餘時間玩「蘿蔔刀」，批評玩具實際上隱藏危險，例如揮動時容易令他人受傷，啲包裝上仲有「睇邊個唔順眼就捅佢一下」呢啲煽動暴力嘅字眼。佢話玩具已經流入香港，甚至喺某啲文具店都有賣，佢關注政府點樣規管同加強執法、教育等工作。

商務同經濟發展局局長丘應樺話，海關收到有關蘿蔔刀嘅投訴，已經作出跟進，喺市面上試購樣本發現蘿蔔刀用塑膠製造，形狀似一把小型美工刀，但無金屬片。政府化驗所按照歐洲標準BSEN71作安全測試，包括銳利邊緣同銳利尖端測試，結果顯示蘿蔔刀樣本符合安全標準。

丘應樺表示，政府好重視確保玩具同兒童產品嘅安全，已經制定咗玩具同兒童產品安全條例，規定任何人唔可以製造、進口或供應任何玩具，除非該玩具符合條例附表列明嘅安全標準。違反條例人士首次定罪，最高可判處監禁一年同罰款10萬元；其後每次定罪最高可判監禁兩年同罰款50萬元。條例列明嘅安全標準都係國際標準或主要經濟體採用嘅標準，政府會留意安全標準嘅更新同修訂，每年修訂條例嘅安全標準。

佢又指出，最近一次更新安全標準已經喺今年8月1日生效；而新一年嘅修訂剛於12月1日，就適用於玩具同六類兒童產品嘅安全標準建議，開始公眾諮詢，計劃喺出年第一季將有關修訂提交立法會。

據《星島日報》引述香港情緒學會會長、精神科專科醫生林美玲表示，呢類玩具進入校園，會存在一定危險性，例如傷及眼睛或其他部位，可能會造成不可逆轉嘅損害。佢又指學生模仿社交平台玩呢啲玩具，佢話舞刀弄劍嘅玩具意識形態唔啱，具有攻擊性，會形成心理暗示，激發孩子暴力傾向，對未成年人安全健康成長產生不良影響，認為學校同家長都需要加強監管。

不過對於議員嘅憂慮，有網民表示「真正攞刀斬人果啲就高尚情操，玩具就講到咁危險」「越來越多反智問題，該管唔管」「日日拎真刀果d唔諗辦法處理，淨係識搞d小學生野」。