催生鱷魚淚? 北韓出生率低於開發中國家平均 金正恩落淚籲女性多生育
催生鱷魚淚? 北韓出生率低於開發中國家平均 金正恩落淚籲女性多生育

全球好多國家都面對生育率低嘅問題,有啲國家會用多種福利誘使國民生仔,有啲地方就會派兩萬蚊。而北韓就比較特別,用「男兒淚」催生。喺北韓平壤舉行嘅「全國母親代表大會」上,金正恩發表演說,強調「母親」嘅力量對於維護國家至關重要,更罕有地流下眼淚,呼籲女性多生育。

   

根據朝鮮中央通訊社(KCNA)嘅報道,呢次大會嘅目的係為咗解決北韓日益嚴峻嘅低出生率問題,並特別強調已婚婦女嘅生育責任。金正恩喺會議嘅最後一日發表講話,佢指要遏制生育率嘅下降同提供優質嘅兒童保育同教育,係全民嘅責任,要同母親們一齊承擔嘅。

   

金正恩又向全國母親表示感謝,並話自己每當遇到困難嘅時候都會諗起母親,佢又話社會上有不少問題,都需用母親嘅力量來解決,例如養育子女、解決非社會主義問題、促進家庭和諧、提高生育率等。

   

對此,南韓統一部官員指出,呢次係金正恩首次提及北韓「生育率低」問題,雖然該活動過去都鼓勵女性多生育,但金正恩首次喺活動上發表演說並提及相關議題,可見北韓對於相關問題感到憂慮。

   

據南韓估計,過去十多年中北韓嘅生育率處於下降狀態。聯合國人口基金會稱,至2023年,北韓嘅生育率為平均一名女性生育1.8個小孩,低於發展中國家嘅平均2.1個。有分析指出,儘管北韓係世界上最窮嘅國家之一,但係佢哋嘅人口結構變化同富裕國家有類似嘅趨勢。

   

翻查資料,喺1970年同1980年代,北韓為咗減緩戰後人口增長過快嘅問題,實施咗人口控制政策。而喺1990年代中期嘅嚴重飢荒期間,人口數量同生育率都出現咗明顯下降。據《每日電訊報》報導,從1960年代至1990年代末,北韓嘅生育率從最高嘅4.05降到2.1。

   

《每日郵報》引用韓國統計數據,估計目前北韓嘅人口大約為2570萬。位於韓國嘅現代研究所發布嘅報告預測,北韓嘅人口可能會喺2034年開始下降,並喺2070年減少到2370萬人。

   

據北韓官方媒體今年早啲時候嘅報導,為咗應對低生育率,政府為生三個或以上孩子嘅家庭提供咗一系列福利措施,包括優惠嘅住房安排、育兒津貼、免費食品、藥物同生活用品,仲有學費津貼等。當局希望通過呢啲社會福利嚟提高生育率。

   

韓國統一研究院(KINU)嘅資深研究員洪敏(音譯)對《韓聯社》表示,北韓政府11年嚟頭一次舉辦全國母親大會嘅目的,係為咗解決低生育率問題,並鼓勵家庭提高年輕一代嘅「國家忠誠度」。


   

《每日電訊報》轉載嘅朝鮮中央通訊社報導中,金正恩提醒母親們,佢哋嘅主要任務係向下一代灌輸「社會主義嘅美德」,並宣揚效忠於黨嘅意識。佢認為,除非母親係共產黨員,否則好難養育出共產黨員嘅女兒,並呼籲家庭加入革命。金正恩又警告,父母必須消除外國文化對年輕人嘅影響,並應該將孩子送去國家進行勞動教育,以培養出符合「北韓風格」嘅新一代。

發佈時間: 2023年12月06日 15:14
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.