被問周庭有否由國安陪同返大陸 李家超:個案細節不便討論 斥出賣誠信欺騙同情 美媒:學者憂引入新疆思想改造
被問周庭有否由國安陪同返大陸 李家超:個案細節不便討論 斥出賣誠信欺騙同情 美媒:學者憂引入新疆思想改造

前香港眾志副秘書長周庭宣佈已離港加拿大讀書,同時宣佈不再就國安案回港報到,特首李家超今日喺行會前見記者,斥周庭出賣誠信、欺騙同情、意圖製造光環,但被問到周庭有冇由國安陪同返大陸,佢就話個案細節不便討論。而外媒分析指令人聯想到新疆式的思想改造,感到匪夷所思。

   

李家超表示,逃犯涉及勾結外國勢力威脅國家安全,警方會全力追捕,除非逃犯自首,否則會終身追捕。佢又批評周庭試圖為自己製造光環,形容佢嘅行為可恥。佢指警方嘗試寬大處理,但換來嘅係矇騙,最失望嘅係被欺騙嘅人員,佢指出,警隊會總結經驗有效維護國家安全,打擊外部勢力對港威脅。

   

李家超又表示「2019黑暴傷口好咗,但痛得很厲害,痛得難以入睡」,所以不可以忘記,認為基本法23條立法必須全力推進,喺下年完成立法,確保23條法例同香港國安法聯繫、成為堅實嘅國安體系。

   

對於周庭是否由國安部門陪返內地,以及將來會否收緊其他被捕人嘅保釋條件,李家超未有正面回應。佢僅表示不會討論個案細節,因為追捕任何人士後,相關資料會否作為證據,要留畀執法部門衡量。

   

周庭喺IG發文中提到,為咗拿返護照同升學,佢不得不接受安排去深圳參觀一日,包括參觀中國嘅「改革開放展覽」,了解歷代中國領導人嘅「輝煌成就」。她表示這過程中不斷要寫悔過書,表明對過去政治參與感到後悔,並承諾將來唔會再參與政治活動。

   

《美國之音》引述化名為陳正中嘅學者分析指,周庭嘅經歷令人聯想到新疆嘅再教育營。學者擔憂,香港國安法執法情況可能比中國大陸更加嚴重,若周庭所述屬實,則可能涉及「未審先判」嘅情況。又指周庭流亡事件可能進一步影響香港嘅國際形象,甚至影響國際投資者嘅信心。

   

報道又引述前中國政協委員劉夢熊表示,警方要求周庭寫悔過書同返內地參觀,可能參考毛澤東時代嘅思想改造策略。劉夢熊指出,周庭嘅經歷有違普通法嘅無罪假定,認為香港作為國際金融中心嘅兩個基石,即法治同自由仲係咪存在,國際社會會有更大嘅疑慮。劉夢熊呼籲當局反思為何香港青年人對未來失去信心,並指出如果青年對香港前景感到絕望,當局應該要好好檢討自己嘅施政策略。

發佈時間: 2023年12月05日 13:02
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.