中國知名連鎖咖啡品牌「瑞幸咖啡」，因其創新口味如「茅台醬香拿鐵」成為網上熱話，近期卻因商標侵權案喺泰國敗訴成為話題。有網民舊年喺泰國發現一間外觀同瑞幸極為相似嘅「山寨店」，引發瑞幸跨海進行法律訴訟，但最終泰國法院裁定瑞幸敗訴。

泰國智慧財產權同國際貿易中央法庭喺12月1日宣佈，瑞幸咖啡公司控告泰國皇家50R集團侵犯商標版權案以瑞幸敗訴告終。泰國皇家50R集團喺泰國註冊咗瑞幸品牌商標，並喺近兩年開設咗多間門店。呢啲店鋪從裝潢到Logo設計，都同瑞幸相似，只係將Logo中嘅小鹿圖案翻轉。瑞幸咖啡對於判決結果上未有作出回應。

事源喺2021年1月，有網民喺泰國發現疑似瑞幸咖啡嘅門店，引發關注。瑞幸咖啡喺2021年8月發出嚴正聲明，表示無喺泰國開店，而嗰間「向左看小鹿」logo同使用luckin coffee名稱已造成品牌嚴重傷害，相關部門已採用法律手段維權。

不過，根據泰國當地法律，由於皇家50R集團較早喺泰國申請商標，因此具有合法開店嘅權利，而呢個亦都係瑞幸敗訴嘅原因。

據悉，泰國皇家50R集團係一間從事零售、新能源、旅遊業、房地產、餐飲業等元化經營嘅本土企業，背景包括泰國皇室同軍方政府。中國食品產業分析師朱丹蓬指出，瑞幸所狀告嘅公司有強大背景，訴訟過程中唔排除存在一啲不可控嘅因素。佢又指呢一事件都為中國企業提供咗海外擴張嘅經驗教訓：「隨著越來越多中國企業開啟國際化戰略，這一類的案件跟糾紛會進一步增加，這就提醒國內企業要把智慧財產權保護這塊做得更強、更精、更透。」

瑞幸咖啡喺近年來積極擴展海外市場，2019年計劃進軍中東同印度市場，但因2020年被曝財務造假，從美股退市後，其國際化戰略暫時擱置。2021年，瑞幸再次啟動國際化策略，但表示將「審慎開拓海外市場」。目前，瑞幸已喺新加坡等東南亞國家設立門店，並計劃喺未來繼續拓展海外市場。根據其最新嘅財報，瑞幸咖啡喺新加坡嘅門店數量已達18家。

對於事件，有內地網民喺微博表示好有既視感：「這集我在喬丹和中國喬丹看過」「中國喬丹的迴旋鏢」「出來混，早晚要還的」，更有人指「真喬丹告贏假喬丹也花了十年」。亦有人補充「名創優品和無印良品」、「廣東省佛山市順德區勒流鎮的榮華和香港的榮華月餅」也是如此。